Babag sa pasidungog
- Leo Lastimosa (Banat) - August 11, 2015 - 10:00am

Seguro nang makaangkon og Medal of Valor si Police Officer 2 Romeo Cumanoy Cempron, lumad nga taga Danao, Bohol, tungod sa talagsaong kaisog nga iyang gipasundayag sa engkuwentro sa Mamasapano, Maguindanao sa niaging Enero 25 ning tuiga. Apan di pa karon. Nipasabot ang kadagkoan sa Philippine National Police (PNP) nga naapsan sila sa panahon tungod sa kakuti sa proseso ug sa kadaghan sa gikinahanglan nga mga dokumento sa labing taas nga pasidungog sa kaisog. Kun nahinayon pang pasidungog sa niaging semana, si Cempron unta ang labing unang Medal of Valor awardee sa pamunoan ni Presidente Noynoy Aquino. Wa koy ebidensiya, lunlon ni pangagpas, apan nagduda kong mao ni tinuod nga hinungdan nga nalangay ang pasidungog.

* * *

Nabalaka kong hangtud karon wa pa gyud makaamgo si Aquino sa kadako sa sakripisyo nilang Cempron ug ubang mga sakop sa Special Action Force (SAF) sa PNP sa ilang pagpatuman sa Oplan Exodus. Nabutaan pa gihapon sa iyang kasuko sa retiradong SAF Chief Getulio Napeñas ug sa ubang nagduma sa operasyon nga nisangpot sa kamatayon nilang Cempron ug laing 43 ka SAF commandos. Di makiangayon ang pagdumot ni Aquino. Di lang tungod kay nagtuman ra sa mga sugo ni Napeñas silang Cempron ug kaubanan kun dili tungod sab sa pagdupa ni Aquino sa mas dakong bulilyaso sa suod niyang higala nga si kanhi PNP Chief Alan Purisima sa ilegal nga pagduma sa operasyon.

* * *

Wa sugata ni Aquino ang mga haya sa SAF 44 sa Villamor Air Base kay gipalabi ang inagurasyon sa planta sa sakyanan sa Laguna. Inay magbangotan uban sa mga tagtungod mas gihatagan hinuon og importansiya ang pagkamatay sa iyang amahan ug pagdumili nila pagpanimawos sa diktadura ni Ferdinand Marcos nga gipasanginlan sa krimen.

Gipasalamatan ang tigsudlay sa iyang buhok apan wa hisguti ang SAF 44 sa kataposan niyang State of the Nation Address (SONA). Maong siyay gidudahang nikanselar sa pasidungog ni Cempron bisan nahinaykan na og pahibawo sa PNP Special Promotion, Awards and Deliberation Board (SPADB).

* * *

Kun mahatagan na sa pasidungog si Cempron, madawat sa iyang biyuda nga si Dr. Christine Abucay-Cempron ang pasidungog nga P20,000 matag buwan, patong sa ubang benepisyo, way buhis ug mapahimuslan hangtud nga magminyo siya pag-usab. Apan si Christine di kasarangang biyuda. Nikuyog siya sa protesta sa militanteng mga pundok pag-awhag sa resignasyon ni Aquino.

Mga suod ni Aquino nikumpisal nga gituman sa presidente ang ilang panumpa nga “way biyaay.” Maong naglisod si Aquino pagtahan nilang Purisima ug ubang mga higala nga nagpakauwaw. Mga kaatbang ni Aquino, nga ang labing inila ug gamhanan napriso ug nataktak na sa katungdanan, makasulti ni Christine sa ilang nakat-onan nga pait nga taras ni Aquino: “Way pasayloay.”

* * *

leo_lastimosa@abs-cbn.com

ANG APAN AQUINO ATILDE AWARDS AND DELIBERATION BOARD CEMPRON CHIEF ALAN PURISIMA MEDAL OF VALOR MGA NGA QUOT
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with