Saludo sa dakbayan sa Bogo

Saludo ko sa gibuhat sa kagamhanan sa dakbayan sa Bogo nga paghatag serbisyo medical ug dental ingon man paghatag hinabang sa mga lugar sa habagatang bahin sa Sugbo nga nabiktima sa bagyong Seniang. Ang grupo pinangulohan ni Mayor Junie Martinez ug ni bokal Tining Martinez midala sa ilang mobile clinic ngadto sa lungsod sa Alcantara, Ronda ug silingang mga lungsod aron makahatag og serbisyo sa mga biktima sa katalagman sama sa nahitabo sa Bogo City dihang mikusokuso usab ang bagyong Yolanda sa ilang lugar. Para nako usa ka maayong buhat ang gihimo sa kagamhanan sa siyudad sa Bogo nga pagtabang ngadto sa mga biktima sa katalagman kay tingali ilang nabatyagan ang panginahanglan sa mga biktima sa bagyong Seniang sama sa ilang nasinati dihang sila ang nabiktima sa makalilisang mga bagyong Yolanda. Kun nahimo sa kagamhanan sa Bogo ang pagtabang ngadto sa mga nabiktima sa bagyong Seniang nganong wala pa man ang DSWS 7 nga sila man unta ang nag-unang ahensiya nga gisangunan sa gobiyerno nga maoy motabang gilayon sa panginahanglan sa naigo sa katalagman. Usbon ko saludo ko sa gihimo ni Mayor Martinez ug sa siyudad sa Bogo kay migahin gyud og panahon aron makatabang sa mga biktima sa bagyong Seniang sa habagatang Sugbo.

Brgy Kinasang-An, Cebu City

“Akong panawagan sa among kapitan nga atimanon intawon ang problema sa ilegal drugs sa lower Paradise 2 sa Langub kay daghan kaayo ang mga adik nga mosulod diha kuyawan na mi.”

Brgy Campao Oriental, Getafe, Bohol

“Unsa nay rason sa among mga opisyales sa barangay diri labi na sa among kapitan nga wala man gyud sila kabadlong aning baligyaay og shabu diri sa bliss nga klaro na man unta kaayo.”

Brgy Pulpogan, Consolacion, Cebu

“Tabangi intawon mi sir Jun nga mahatagan nig aksyon diri sa aming lugar kay daghan na kaayog namaligya’g shabu duol ra gyud sa elementary ug high school kuyawan mi nga naay mga estudyante nga maagni aning mga pusher.”

Brgy Valencia, Alegria, Cebu

“Diri sa sitio Lamacan naproblema mi aning among karsada diri pwerte na gyong gubaa labi na kun mag-uwan daghan kaayo ang mahasol maayo unta’g matabangan mi nga matrabaho ning karsadaha kay dugay naming gaantos.”

Brgy Kalawisan, Lapu-Lapu City

“Nagkagrabe na man gyud tawon ning ilegal nga drugas sa among lugar Sir pero mga polis wala man gyud pakabana pagsulbad ani  nga problema pero kakita mi’g polis nga mag- anhaan sa balay anang mamaligyaay og shabu.”

Brgy Santikon, Badian, Cebu

“Sir Jun magpatabang unta mi nimo nga ma-report sa mga hingtungdang ahensya aron masulbad ang pagdagsang sa shabu diri kay hasta tanod moapil na man sad og suyop amo kapitan wala kabadlong.”

Brgy Banilad, Mandaue City

“Kusog gihapon kaayo ang tigbakay diri sa sitio Orel hapit kada Domingo ni mahitabo pero mga polis wa kadakop kay naa say moapil unya naa say tig-arian diri nga maoy tigkulekta.”