Kun ang dokumento mangawala

Dear Atty. Divine,

Dunay yuta ang akong lola sa Bohol apan wala mi kopya sa tax declaration ug uban pa’ng dokumento niini. Sa wala pa mamatay ang akong inahan gitug-anan ko niya nga dunay tanom nga mga lubi ug prutas ang maong yuta nga kabilin sa akong lola. Niadtong miaging tuig namatay ang akong mama nga maoy bugtong sumusunod ni lola. Gusto unta namo nga ibalhin sa among pangalan ang maong yuta kay tulo man mi ka magsuon apan ang problema kay wala man mi kopya sa tax declaration. Unsa may maayo namo nga buhaton? - Linda

Dear Linda,

Kun wa mo’y kopya sa tax declaration sa maong property mahimo mo nga mangayo og certified true copy sa tax declaration sa property sa inyong lola gikan sa Assessor's Office sa Munisipyo o sa City Hall diin mahimutang ang maong yuta. Dali ra na pag-trace ang maong property sa Munisipyo tungod sa computerization nga diin ihatag lang ninyo ang pangalan sa inyong lola ug matan aw na nila sa record ang iyang gipanag- iya nga yuta sa maong lugar. Kun titulado ang property mahimo ‘sab mo nga mangayo og certified true copy sa Title niini sa Register of Deeds. Kun duna na mo’y dokumento mo-execute dayon mo og Extra Judicial Partition aron inyong i-submit sa BIR aron pagbayad sa Estate Tax aron ma-process ang pagbalhin niini ngadto sa inyong pangalan. Apan kun titulado ang property kinahanglan g’yud ninyong i-submit sa Register of Deeds ang kopya sa original Title aron mo mahatagan og bag-ong titulo ubos na sa inyong pangan. Kun nawala ang titulo then modangop g’yud mo sa korte pinaagi sa pag-file og Petition for the issuance of new Title hulip sa nawala nga titulo. - Atty. Divine

Kun duna kay pangutana ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.