Nakurat ang kalibutan, ilabi na ang mga nasud sa Asya, sa dihang nalunod ang barko nga Sewol sa Jindo, South Korea niadtong semana diin ang mga patay nga nakit-an miabot na og 100 kabuok. Tanang mga nasud mipadayag sa ilang simpatiya ngadto sa mga pamilya sa mga pasahero nga nangamatay sa trahedya. Ang North Korea wala moapil sa pagpadayag sa simpatiya, siyempre tungod kay ang duha ka Korea ubos pa sa sitwasyon sa pakiggubat, kay wala man sila magpinirmahay og peace treaty human ideklarar ang ceasefire niadtong Hulyo sa 1953.
Apan dili kini maoy isyu nga akong gustong tukion. Ang akong tuyo mao ang pagpahigmata sa atong Maritime officials sa nasud. Kun nakabasa kamo sa balita, dali kaayong naka-aresto ang mga awtoridad sa kapitan sa nalunod nga Sewol. Si Lee Joon-Seok gimando nga prisohon ug taralon sa hukmanan tungod sa pagpabaya sa katungdanan.
Ambot unsay nakaon niining kapitana nga inay imando ang “abandon ship†iya man hinuong gibadlong ang mga pasahero nga manglayat na unta nga pabalikon lang sa ilang mga kuwarto ug dili paambakon sa dagat kay hadlok siya nga mangalunod og apil ini’g kalunod sa barko. Mismo ang presidente sa South Korea nga si Park Guen-hye mimando pag-imbestigar kang Lee ug sa iyang mga kaubanang tripulante aron patubagon sa kamatayon ug pagkaangol sa mga pasahero. Apan dinhi sa Pilipinas, unsay mahitabo kun adunay mga barko nga mangadisgrasya?
Ang mga kapitan hayahay kaayo kay makalingkawas sa ilang tulobagon sa mga nangamatay ug nangaangol nilang pasahero. Tungod ba kaha kini sa korupsiyon diha sa Maritime Industry Authority, Philippine Coast Guard ug sa Department of Transportation and Communication?
Hapit na mo tuig sukad magkabangga ang MV Tomas Aquinas 1 sa 2Go Shipping ug ang Sulpicio Express 7 sa Philippine Span-Asia Carrier Corp. sa Lawis Ledge nga mipatay og kapin sa gatus ka pasahero ug daghan ang na-missing. Apan gitago-tago sa publiko ang resulta sa imbestigasyon sa Special Board of Marine Inquiry, samtang walay silot nga gipahamtang batok sa mga nagdanghag nga kapitan sa duha ka barko. Ingon niini ang kasalikwaot ang balaod sa Pilipinas. Kadtong mga adunahan nga dagko og salaod makahimo pagpalihok sa ilang bahandi ug gahum pagpalingkawas sa ilang tulobagon sa krimen ug responsibilidad magpabilin nga gawasnon, kay sa mga pordoy nga mangawat og buwad aron ilabang sa kagutom nga dali ra nga posasan ug itaral sa hukmanan. Hain na man ang kapitan sa 2Go ug sa Sulpicio? Nganong wala man sila patubaga sa maong trahedya?
Kun pabiling ingon niini ang hustisya sa Pilipinas, magpabilin kitang kataw-anan sa mga silinganan natong mga nasud sa Asya tungod kay dinhi lamang nasura makit-an ang hustisya mahimong kabayran og kuwarta. Duha ka adlaw lamang human malunod ang Sewol sa Jindo, apan si Kapitan Lee gisikop dayon, giposasan ug gipatubag sa iyang kadanghag. Apan mo-usa na lang ka tuig human sa trahedya sa Lawis Ledge, ang kapitan sa 2Go ug Sulpicio, nagpabili gihapong naglaroy-laroy daw walay tulobagon sa ilang kadanghag nga mibilin og daghang patay, missing ug angol nga mga pasahero.