Usbawan kuno ang SSS pension
SENIOR CITIZENS CORNER - A.M. Dela Serna (Banat) - October 4, 2013 - 12:00am

Honestly, waa gyud ko mahibawo kun nausbawan ba ang atong pension gikan sa SSS. Kini tungod kay ang naggunit sa akong ATM card, ang ako mang anak, aron di ko mahasol paglinyalinya sa pag-withdraw kun magkinahanglan nako’g kwarta.

Busa, waa sad ko mahibawo kun nausbawan na ba ang akong pension, pinasikad sa balaud. Atong kutloon ang mga balaud 9257 ug 9994:  “Retirement benefits of retirees from both the government and the private sectors shall be regularly reviewed to ensure their responsiveness and sustainability, and to the extent practicable and feasible, shall be upgraded to be at par with the current scale enjoyed by those in actual service. “

Gituman ba ni? Regular ba, kun duna man, ang pag-review ug pag-upgrade sa mga pension sa SSS ug GSIS? Makaambas o makatupong-tupong ba kini sa kasamtangang scale sa nagtrabaho pa? Ang ato karong pension makatubag pa ba sa atong mga panginahanglan?

Sa laktud, pila ra man ka kilong bugas ang mapalit ini? Ang karne? Isda ug mga utanon? Unya, what about shelter ug clothing? Sa ato pa, kun ang pension lang sa SSS ang saligan, sikwati gyud ang labas. Kaluoy!

Apan, unsa may gihimo karon sa SSS? Giaprobahan sa Malacañang ang 6 percent nga usbaw sa SSS contribution. Ok lang ni, kay tingalig mahurot ang pundo sa SSS. 

Apan, ang pension diay? Kutob lang ta sa paghisguthisgot ini. Dugang hisgot mao nga usbawan kono ang atong pension sugod sunod tuig. Ato kining kutloon:

“Meantime, SSS president Emilio de Quiros Jr. said the SSS intends to also raise pension benefits.” Note the word “intends.” Sa ato pa, naghunahuna pa, naglaraw pa. Padayon:

“He said the SSS was looking at a 5-percent hike in monthly benefits of SSS pensioners to be implemented also in 2014.”  Note again the word  “looking,” sa ato pa, nagtan-aw pa, waa pay klaro kun makakita ba gyud.

Gikan sa tuig 1980, ang ato konong pension benefits “rose 21 times.” Tinuod ba gud ni?  Ka 21 times na tang nausbawan sa atong mga pension benefits gikan sa mga tuig 1980s? Unsa man ni, unayon ta nila’g pangilad? Nakaminos sila sa mga senior citizens?

Klaro na nga usbawan ang SSS contributions. I-implement na kini sunod tuig. Apan, ang SSS pension, unsa man? Gihunahuna pa. Nga unta gimando man sa balaud nga himoon ang regular nga pag-review ug pag-upgrade ini. Pastilan, ang pork barrel man hinuoy giseguro sa atong mga magbabalaud.

Nagsalig lang sila nga inig-retire na nila, inigka-senior citizens na nila, daghan pa kaayo sila’g kwarta, ug dili sila magkinahanglan og pension o cash assistance gikan sa local government. Pagkabulahan ug pagka-swerte ining mga tawhana.

Apan, diha’y nangutana nako: motuo ka ba’g gaba’, bay?

APAN ATO ATONG PENSION QUIROS JR. SSS
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with