Pagbag-o
Sugilanon - Fred Fuentes Monternel (Banat) - March 5, 2018 - 12:00am

Ning hapona, sa  paggawas ni Nimfa sa iyang klasrum uban sa tulo niya ka kaubang maestra nga sila’s Emma, Dina ug Lina, nakurat siya nga naglantaw sa geyt sa eskuylahan. Nasugat sa iyang panan-aw si Rudy, ang bagis sa siyudad nga kanunay mag-estambay sa ilang barangay sa Guadalupe.

“Hala ka, Nim! Mitunga na pud lagi ang suitor mong bagis...!”ni Emma nga mikuhit ni Nimfa.

Bitaw! Taudtaod na man ning nawala si Rudy! Karon, nia na sab kay gimingaw ang prince charming mong kusog mangdelensya ug mamaregla dinhi sa mga kalye sa Guadalupe...!” mikatawa si Dina nga midagpi sa abaga ni Nimfa.

“Uy, desente na ra ba ron og pustora si Rudy!  Mibalik gyud tungod sa grabeng gugma nimo, Nim...!” mikatawa sab si Lina nga nagpanakla.

Igo lang nga gipahiyoman ni Nimfa ang tulo niya ka kaubang maestra nga pulos na mga minyo. Sa tanang nanguyab niya, si Rudy ra ang bagis nga estambay. Mao nga giprangkahan gyud niya si Rudy.

“Pagbag-o na, uy, Rud! Wa kay mapaabot nako! Unsay makuha nako sa bagis, estambay, mangdelensyahay ug mamareglahay sa siyudad...?”

Kalit nahanaw si Rudy sa Guadalupe. Apan mibati’g kamingaw si Nimfa sa bagis. Naglibog siya. Wa siya kasabot sa iyang gibati!

“Malipayong hapon nimo, Nim...!” timbaya ni Rudy.

 “Maayong  hapon sab nimo, Rud! Hmm, maila sa imong bayhon nga nagbag-o na ka...!” bugnaw ang tingog ni Nimfa.

“Oo, Nim! Gituman lang nako ang sugyot mong pagbag-o nako! Human sa tulo ka bulan, giantos ko ang tanan, tungod sa gugma ko nimo...!”

Sa unahan og diyutay, may puti nga awto nga nagparking sa dalan.

 “Dali, Nim! Sakay sa awto nga gipalit nilang Papa ug Mama nako, tungod sa gisaad ko nilang pagbag-o sa kinabuhi nga magbinuotan na. Gusto ka nga maila-ila sa mga negosyante kong ginikanan sa Cordova, isip babaye nga nakapabag-o nako og maoy akong pangasaw-on! Sakay na, Nim..!”

Mao na lamay nabatyagan ni Nimfa nga misakay siya sa awto ni Rudy. Natugkad karon niya nga nahigugma na gayud siya sa bagis nga nagbag-o na.  (Kataposan)

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with