Buhi kanunay ang imong larawan

CEBU, Philippines — Nakita na usab ni Dindo si Clarita nga naglingkod sa may pangpang ilawom sa handag nga lubi. Nia siya kay nagpaabot kang Basilio nga  iyang hinigugma ug usa ka mananagat.

Duna sila’y relasyon ug kon wala masayop si Dindo mga kapin na sa tulo ka tuig ang ilang relasyon ni Basilio. Nakaingon si Dindo sa kaugalingon nga suwerte si Basilio kay buotan si Clarita.

Kugihan kini, ug kay anak intawon usab og kabos nga taga dinhi sa ilang sityo Bakasi, manawat kini’g labada sa mga silingang dato Ug human niini’g laba manuroy kini’g isda.

Si Clarita motagad gyod kang Dindo. Dili man sab dato sila si Dindo. Ang iyang tatay Insiong mamuhat og mga baroto. Ug siya nakat-on na ning matanga sa panginabuhi. Kon dunay mo-order siya na ang tahasan sa iyang tatay sa paghimo’g sakayan. Unya usa ka hapon naghilak si Clarita nga miduol kaniya. Mora’g dunay dili maayong hitabo.

“Dindo, hu, hu, hu, si ... si Basilio patay na,” niini pa nga mihilak atubangan sa ulitawo. “Hipalgan ang iyang patay’ng lawas nga mora’g dunay daghang samad. Tingali, gituyo gyod og patay si Basilio. Unsa may iyang sala intawon?”

Human ikalubong ang patay’ng lawas ni Basilio, kanunay nang makita ni Dindo si Clarita nga magtuk-ong sa may pangpang ilawom sa lubi nga handag ug maghinuktok.Seguro gimingaw kini ni Basilio. Iya kining giduol ug gilingawlingaw og istorya.

“Clar, ayaw nag hunahunaa si Basilio, bata ka pa, uy. Sa imong kabatan-on, pila gani toy edad nimo, Clar?’ nangutana si Dindo.

“Desi nuybe,” mubo niining tubag.

“Maguwang lang diay ko nimo’g duha ka tuig. Bayinti uno na man ko,” ni Dindo nga milantaw sa halayo. “Duna may gibuhat nga nahigugma nimo dinhi sa ato, Clar,” ni Dindo ngadtong Clarita.

“Kinsa man na siya, Din?” nangutana si Clarita.

“Ako, ako, Clarita, dugay na kong nahigugma nimo, ugaling naa man kadto si Basilio. Pero, karon nga wala na, may paglaom kaha ko?” seryoso ang tingog ni Dindo.

Mipahiyom si Clarita. Unya, misandig kang Dindo. (Katapusan)