^

Banat Kalingawan

Taytayan sa Gugma - Gula 2

Dro Arts - Banat

Dili hitupngan nga kabalaka ang gibati sa inahan samtang misagakay sa anak paingon sa ilang higdaanan.  “Kainit nimo day Ginoo ko gi-convulsion ka man day.

Unsa may akong buhaton? Hain na man ni ang imong maguwang intawon oy. Kadiyot inday magkuha sa ko’g labakara’g tubig,” ni Dorina nga nagkabuang nga nagkuhag labakara gamay’ng planggana nga gibutangan niya’g tubig ug suka dayon daling mibalik ngadto kang Bernalyn nga makapaso ang kainit tungod sa taas niining hilanat.

Gibasa ang labakara sa tubig nga sinagolan og suka dayon gitrapo sa hilit nga dapit sa kalawasan sa bata aron molurang og diyutay ang kainit ni Bernalyn. Gihabulan kini sa gision nilang habol aron makuha-kuhaan ang katugnaw sa anak. Padayon ang pagpangurog ni Bernalyn ug padayon usab sa iyang gibuhat si Dorina sa anak diin nag-iyahay na pagtulo ang mga luha. Gibasa pag-usab ang labakara gipilo ug gipatong sa agtang ni Bernalyn.  Pipila ka minuto nga pag-atiman sa inahan ngadto sa 5 anyos nga anak. Mikuha pag laing habol aron idugang sa gihabol sa anak. Mikuha og tambal sa butanganan niini. Mikuha’g kutsara ug gidaginot ang nahibiling syrup diha sa garapa ug gipainom ngadto kang Bernalyn nga naa pa ang gamay’ng pagpangurog. Nagpasalamat ang inahan kay nawala na ang pag-convulsion ni Bernalyn.

“Ma tugnaw kaayo,” ni Bernalyn pa nga nagkurog usab ang wait niini.

“Anak Bernalyn nia si mama,” ni Dorina nga gihapuhap ang ulo sa anak ug mipaka na usab ang makusog nga liti.

“Ahhhhhh!” Pagsinggit ni Bernalyn sa kahadlok daling gigakos ni Dorina ang anak.

“Shh..shhh shhh.. nia si mama.. ayaw kahadlok,” matud pa ni Dorina nga migakos sa anak aron pinaagi usab sa iyang kainit sa lawas mainitan ang nagpangurog nga anak.

“Hadlok ko ma hadlok ko,” matud pa ni Bernalyn nga gisundan sa pag-agulo nagdeleriyo ang bata.

“Ayaw kahadlok kay naa ra lagi si mama sa imong tupad dili ka biyaan ni mama,” matud pa ni Dorina nga nanglugmaw ang mga luha. Nakahunahuna kun nganong ingon sila niini ka lisud sama sa manok nga kun may kakha adunay matuka.

“Ma...” pagsangpit sa batang lalaki nga naa pa sa gawas daling nahalingi si Dorina sa nahimutangan sa nagtawag. “Ginoo ko dong Bernabie kabasa nimo,” ni Dorina nga padayong nagakos kang Bernalyn.

“Dugay ko na uli ma kay uwan man kaayo gud mipasilong una ko pero wa man moundang ang uwan maong midagan na lang ko bahala’g mabasa ko sa uwan,” matud pa ni Bernabie nga gibutang ang sako sa kilid sa pultahan.

“Unsa manang imong dala?” pangutana pa ni Dorina mingisi si Bernabie.

“Mga lata na ma nagdala man ko’g sako paingon nako sa eskwelahan. Mihapit na lang ko’g pamasura,” matud pa sa anak nga miduol sa inahan nga mikuha sa gision nilang tualya dayong hubo sa basa niining gisul-ob.

“Unya nabasa ang imong mga libro ug notebook?” pangutana pa sa inahan nga nabalaka usab nga nagtan-aw kang Bernabie samtang nagakos gihapon kang Bernalyn.

“Wa oy nangayo man ko didto sa tindahan og dakong plastic akong gisulod ang net bag nga gisudlan nako sa akong mga libro ug notebook unya akong gihugot paghikot aron dili mabasa sa uwan,” matud pa ni Bernabie. Dayon mitan-aw sa manghud nga nagpangurog gihapon nga nagpiyong ang mga mata, “ma, naunsa si inday?” matud pa ni Bernabie. “Gihilantan og maayo,” tubag pa ni Dorina sa anak. Dayon mikuot sa iyang bulsa si Bernabie ug may gitunol sa inahan. “Ma oh. Para palit og tambal ni inday,” ni Bernabie nga mitunol og pipila ka sensiyo ngadto sa inahan.

“Diin ka’g kuwarta, Bernabie?” pagpangunot sa agtang ni Dorina. (Sumpayan)

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with