^

Banat Kalingawan

Idolo sa kabataan

Dro Arts - Banat

Gula 134

“Sa mga death threat nga nadawat ni Pia, ikaw gihapon ang responsable lola?” ni Kyle.

“Ang akong sinugo Kyle maoy kanunay nga magtext anang Pia,” matud pa sa senyora.

“Wala gyud diay mi masayop sa among pagduda nga kadtong tawhana ang kanunay nga manghulga kang Pia nganong gibuhat mo man ni nako lola? Nganong dili man mo makasabot kun kinsay gipitik sa akong kasing-kasing?' ni Kyle nga mihilak na sa atubangan sa apohan.

“Naglantaw lang ko sa imong kaayohan Kyle maayo gani kay wa mag apil-apil si lolo mo kay kun nag apil-apil pa siya niini dili lang pagpanghulga ang madawat nianang Pia. Tingalig makita na lang unya siya sa usa ka bakanteng lugar nga wa nay kinabuhi nahibawo kana sa batasan sa imong lolo. Iyang gisalig nako kining mahitungod sa pagpakabuang mo sa usa ka babaye nga way dungog,” matud pa sa senyora.

“Lola Conchita,” bugtong pulong ni Kyle.

“Utro pud nang imong inahan kunsentidor'ng dako!” matud pa ni senyora Conchita. “Kana kay nakasabot si mama sa akong gibati kamo lang ang dili maantigong musabot,” ni Kyle pa.

“Andam kong mogasto bisag usa ka milyon pa Kyle, lamang mahanaw sa imong kinabuhi kanang Pia,” pintok nga pagkasulti sa apohan. Samtang sa laing bahin usab didto sa panimalay nilang Mylene kalit nga mibutho si Diane sa luyo ni Mylene samtang nag-asikaso sa mga kinahanglanon sa iyang pag-resign isip magtutudlo.

“Busy ang akong inahan nga kunsentidor,” ni Diane pa nga sarkastiko ang tuno.

“Diane? Ikaw diay? Diin ka ba gikan? Wa ka mopauli sa apartment?” ni Mylene pa nga busy sa iyang gibuhat.

“Didto ko gikan sa mansiyon ug sugod karon dili na ko mupauli sa apartment,” matud pa ni Diane “ug unsay hinungdan?” pagpangunot sa agtang sa inahan. “Aron mabantayan mo sa unsay inyong mga lakaw ni kuya,” matud pa ni Diane.

“Unsa? Unsay buot mong ipasabot?” pagkalibog ni Mylene sa gisulti sa anak.

“Maestra baya ka bright, tinamud, idolo sa liboan ka mga kabataan sabta kun unsay buot kong ipasabot ayaw pagoryo-goryo,” matud pa ni Diane.

“Dili na gyud maayo nang imong batasan Diane,” matud pa ni Mylene.

“Weeehh? Unya? Maayo na mo si kuya sa inyong mga tinaguan? Maayo na mo sa inyong gibuhat nga pagtago sa tinuodd nga nagbalik sila si Pia ug kuya? Dili diay ko mahibulong kun nganong bakakon si kuya. Liwat gyud diay siya nimo ikaw sab nga pagka-inahan kunsentidor ka,” ni Diane pa. Pakkkk!! Pagpaka sa aping ni Diane nasagpaan sa inahan kay wala na makapugong sa kamaldita sa anak.

“Wa ka nako pakatawha aron musulti ka’g sama nako ana Diane!” ni Mylene pa.

“Wala sab nako pangayua gikan nimo nga pakatawhon ko aron makasaksi sa inyong kabakakon!” Pag-atraka ni Diane nga nagpanghapyod sa aping. “Nanghinobra kana gyung bayhana ka wa na kay respito nako nga imong inahan,” matud pa ni Mylene. “Respito? Ikaw sa imong gibuhat nga mikunsinter kang kuya? Angay pa kang hatagan sa akong respito?” matud pa ni Diane nga dili na pabangbang sa iyang kamaldita. “Diane, ayaw upsa ang akong pailob,” ni Mylene nga nagpangagot na.“May nahibilin pa ba diay kang pailob? Sa imong pagsagpa nako, wa na kay pailob tungod sa litseng Pia ug sa cheap kong igsoon imo kong nadapatan!” matud pa ni Diane. “Tungod kay nanghinobra na kanang baba mo Diane!!” ni Mylene nga medyo miisa na ang tingog.

“Makaabot kang lola ning imong pagsagpa nako!” ni Diane pa. (Sumpayan)

 

 

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with