Tukhang
Sugilanon - Fred Fuentes Monternel (Banat) - August 3, 2016 - 12:00am

Natinuod gayud ang gikabalak-an ni Noy Ponso. Naglingkod siya sa beranda sa iyang balay ning hapona, dihang nabantang sa iyang panan-aw ang duha ka mga pulis nga nanuktok sa balay ni Galy, ang nabaniog nga drug pusher sa ilang barangay.

Kalit lang mitunga pagbalik, human gipabakwet sa probinsiya ang iyang asawa ug mga anak, aron siya makalikay sa way puas nga dinakpanay ug pinatyanay sa mga drug pusher ug drug user nga mosukol sa nagrondang kapulisan sa siyudad. Duha ka semana pang nahibalik si Galy ning giabandonar niyang balay ug si Noy Ponso lang ang gitug-anan niya sa plano na niyang pagsurender sa kapulisan.

"Mas maayo nga nakahunahuna ka sa pagsurender,Gal! Kay may panahon na sa  pagbag-o...!" matud ni Noy Ponso sa drug pusher ganihang udto nga midalikyat og bisita sa iyang balay isip silingan.

"Bitaw, Noy Pons! Kuyaw na ra ba kaayo kay naghingusog na ang pamunoan ni Presidente Duterte sa pagpuo sa mga drug lords, drug protectors, drug users...!"

"Naa na sab ang Oplan Tukhang, Gal...!" "Unsa man nang, Tukhang, Noy Pons....?" 

"Tuktok-Hangyo! Manuktok ang mga pulis sa mga balay ug hangyuon ang mga drug pusher nga mohunong ug mosurender na sa ilegal nga palusot og shabu...!"

"Mao ba? Kuyawan ko, Noy Pons! Duna may reward gud ang kapulisan kon makapatay og mga notadong drug pusher sama nako...!" Nakasabot si Noy Ponso sa gikahadlokan ni Galy. Nakahukom ang drug pusher nga personal nga mosurender inigka ugma sa hepe sa kapulisan sa siyudad. Nakita ni Noy Ponso nga nanuktok na ang duha ka mga pulis sa pultahan sa balay ni Galy ning hapona, nga nagkupot na sa ilang serbis nga kalibre .45. Migula si Galy ug napaatras pagkakita sa armadong mga pulis. Miaksyon sa pagbunot sa gisuksok niyang rebolber sa hawak si Galy. Ug...

"Bang! Bang! Bang! Bang...!"

Nakapanglingo si Noy Ponso sa iyang nasaksihan sa gidangatan ni Galy. Wala madala si Galy sa tukhang (tuktok-hangyo). Busa, nabiktima gayud siya sa tukpu (tuktok-pusil) gikan sa mga pulis kay mihana man siya sa pagsukol. (Kataposan)

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with