Taghoy
Sugilanon - Fred Fuentes Monternel (Banat) - July 31, 2016 - 12:00am

Human sa pipila ka oras nga pagbaktas gikan sa dalan nasyonal nakaginhawa'g luag si Marjun sa dihang haduol na siya sa ilang banika ning sayong kabuntagon.

Human sa duha ka tuig niyang nahilayo sa banika ug nanimpalad sa magahob nga dakbayan, nahibalik na gayod siya sa dapit nga maoy una niyang namat-an og kahayag.

Gipaliraw ni Marjun ang iyang panan-aw sa tibuok kalikopan sa ilang banika nga gidigo sa bidlisiw sa kabuntagon. Ug daw nabati niya ang talagsaong taghoy sa banika nga mura'g malipayong mihangop ning buntaga, sa iyang paghibalik sa sabakan niini. Hawot ug nanuhotsuhot ang maong taghoy nga daw nakapahinumdom ni Marjun sa iyang kagahapon sa banika.

"Tay, Nay mobiya ko's banika! Manimpalad ko's siyudad di ko gustong manimahong init sa adlaw sa pagtikad kanunay sa atong uma sa banika. Wa koy ugma dinhi sa banika!" mao kini ang nakab-ot nga desisyon ni Marjun human makagraduwar sa high school.

"Kakugi lamang ang puhonan dinhi sa banika Jun, mao bitaw nga nakalahutay mi si tatay mo!"

"Bugtong ka namong anak Jun, may bahandi ang atong banika ug mapa-eskuyla ka namo sa kolehiyo sa atong lungsod!"

Apan nanimpalad gayod si Marjun sa siyudad, balon ang kantidad  nga kuwarta sa halin sa gibaligyang usa ka buok baboy sa iyang mga ginikanan. Nag-boarding house siya sa siyudad, nahimo siyang bagger, promodiser ug merchandier sa usa ka department store. Apan nahilig siya sa pagpakigbarkada. Nahimo niyang bisyo ang pag-inom sa binong ilimnon ug paghithit sa shabu. Wa na magkadimao ang iyang pagpanarbaho, hangtod nga naputbol siya. Human sa duha ka tuig nakahukom si Marjun sa pagpa-uli sa gitalikdang banika nga iyang giyam-iran.

Daw nagakakusog ang taghoy sa banika nga nadungog ni Marjun. Nakabiba sa dala niyang gamay'ng traveling bag lagsik ang mga lakang ni Marjun nga nagpadulong na sa ilang balay sa banika ning buntaga, aron sugdan na usab ang laing anib sa pagbag-o sa iyang kinabuhi. (Kataposan)

 

 

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with