Tigpakaaron-ingnon
Sugilanon - Fred Fuentes Monternel (Banat) - March 8, 2016 - 9:00am

Nahasiga ang mga mata ni Mildred, pagkakita niya sa sunod nga speaker sa gitambongan niyang Life In The Spirit Seminar (LSS).

"Ngano, Mil? Kaila nimo si Bro. Piolo...?" "Molang! Kaila ko siya, Gelie...!"

"Mao ba? Usa siya sa maayong facilitator ug speaker sa usa ka relihiyosong kapunongan dinhi sa siyudad! Maayo siyang mopaambit sa pulong sa Ginoo, Mil...!"

Nakapanglingo si Mildred sa kasayuran nga gitug-an kaniya ni Angelie bahin kang Piolo. Gawas nga sakop sa usa ka relihiyosong kapunongan si Piolo, usa usab diay siya ka opisyal sa simbahan sa usa ka parokya dinhi sa siyudad sa Sugbo. Halos namanso na niya ang mga pulong sa Ginoo diha sa Bibliya. Mao nga hanas na si Piolo nga mosangyaw sa Maayong Balita ngadto sa uban. Kasagaran, siyay kuhaon nga facilitator kun adunay mga religious formation class ug speaker sa ipahigayong Life in The Spirit Seminar (LSS) dinhi sa siyudad. Daw dili makatuo si Mildred sa nahipos niyang kasayuran sa pagkatawo ni Piolo gikan kang Angelie.

Usa ka GRO si Mildred sa usa ka inilang night club sa siyudad. Tungod kay guwapa ug porma'g lawas sa edad nga 25, halinon siya sa nahimo niyang sideline  nga pagbaligya sa iyang lawas, bugti sa presyo nga di ikatali og resibo. Ug usa si Piolo sa nahimo niyang suking kustomer nga mo-tsik-in kaniya sa usa ka motel, matag kinsenas ug tapos sa bulan.

"Piol, wa ka ba makonsensiya sa imong asawa nga sige ka'g pangabang nako...?" "Lalim man gud kaayo kang romansahon, Mil! Puol na kaayo ang asawa, uy! Gipangayo ko na's Ginoo nga pasayloon ko sa akong sala nga nakigsuki nimo!"

Hangtod nga wa makabalibad si Mildred sa pag-imbitar kaniya ni Angelie sa pagtambong sa usa ka Life In The Spirit Seminar. Ug mao kini karon ang iyang gitambongan ning adlawa, iyawat na lang nga makabaton na siya sa pagbag-o sa kinabuhi. Hilom nga nakapanglingo si Mildred. Karon, nailhan na gayud niya si Piolo sa matuod niyang pagkatawo, nga usa ka dakong tigpakaaron-ingnon. (Kataposan)

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with