Ang krismas tre ni Ronie

Gidumdom ni Ronie ang punoan sa nag-inusarang magay nga nagtuybo sa kilid sa dakong punoan sa karaang himulbolan sa daplin sa luna sa iyang banika.

Midalikyat siya'g tungas sa banika ning buntaga human sa pamahaw, aron paundayonan ang gihangyo sa ilang siete-anyos nga bugtong anak nila ni Mira si Titoy!

"Pa, ibog gyud ko's balay sa akong mga silingang bata! Naa sila'y mga krismas tre, Pa! Kay Pasko na man gyud, paghimo mos mama og krimas tre, Pa...!"

Nagkatinan-away sila si Ronie ug Mira kagabii. Daghan na tuod nga nanglabay nga mga Pasko, hangtod nga karon, nag-7 anyos na si Titoy, apan wa gyud sila makahimo og krismas tre sulod sa ilang balay.

Hinungdan nakahunahuna dayon siya nga himuong krismas tre ang nalaya na nga sanga sa bulak sa magay sa banika.

Gipasiklapan ni Ronie ang nag-inusarang punoan sa magay. Namatikdan ni Ronie, nga kausa matag tuig da gayud nga mamulak ang labong punoan sa magay. Mahabilin ang sanga sa magay nga maoy gituyboan sa mga bulak niini ug nahimong gaay na sab nga nindot kaayong himuong krismas tre.

Nahinumdom karon si Ronie sa gisulti sa mitaliwan na niyang mga ginikanan, nga ang punoan sa dakong karaan nga himulbolan, maoy pinuy-anan sa dili ingon nato.

Sa pag-abot ni Ronie sa ilang balay, paspas dayon niyang gihimo nga krismas tre ang sanga sa bulak sa magay. Gipatindog niya kini sa sulod sa taro nga gisansanan og mga bato. Gibulitan ang tibuok lawas sa sanga sa magay sa mga gapas. Naporma dayon ang krismas tre. Nagplano si Ronie nga mopalit og mga dayandayan, ingon man sa series bulb. Apan kalit nahibulong si Ronie! Kalit lang nga may kutay na sa series bulb ang bag-o lang nahuman niya nga krismas tre! May mga dayandayan na ang tibuok krismas tre. Ug misugod na sa pagkidlapkidlap ang gikutay nga series bulb! "Pa, katahom sa atong krismas tre...!" tuaw ni Titoy nga malipayong nagsud-ong sa krismas tre sa hawanan. (Kataposan)