Hain si Santa Klaus?
Sugilanon - Jethro Barita Ochea (Banat) - December 10, 2015 - 9:00am

Nahaigpot si Wendel, dihang sagunson nga nagpakapaka ang way puas nga pabuto aron sa paghangop ug pagsugat sa Pasko. Nakamata siya gikan sa iyang paghitagpilaw nga naglingkod sa sopa sa ilang hawanan. Gitutokan niya ang taknaan nga nagbitay sa ilang bungbong. Alas-12 na gayud sa tungang gabii.

"Pasko na! Apan hain si Santa Klaus nga giingon ni mama Nory nga moabot ug magdala nako og pinaskohan...?" nagyagubyob si Wendel nga mitindog ug mipaingon sa pultahan. May nagbitay nga dakong putos!

"Hala! Dinhi na kaha diay si Santa Klaus?" tuaw na sab ni Wendel sa hilom. "Apan hain man sab si mama Nory? nagkalingilingi si Wendel nga milantaw sa ilang kusina diin giplastar na ang noche buena, sa kinilong litsong baboy, fried  chicken, fried rice, budbod, biko, bingka ug pinyato ug may litro nga softdrinks.

Unya, gikuha ni Wendel ang nagbitay nga dakong putos sa ilang pultahan. Ug giukban! May bag-ong paresan sa sapatos nga Nike ug may pusil-pusil nga kinaham ni Wendel. Hilabihang lipaya niya.

Nagdako siya nga way amahan, kay matud pa sa iyang mama, namatay kuno ang iyang amahan sa nag-edad pa siya'g 2 ka tuig.

Nakalukso sa kalipay si Wendel nga nagkupot sa paresan sa branded niyang sapatos ug miabli sa pultahan sa lawak sa iyang inahan. Apan nakahunong siya. Sa sulod sa lawak sa iyang mama Nory, may gikasulting lalake ang iyang inahan. Diha sa salog, mao ang uniporme sa Santa Klaus nga gihukas. Nakigginaksanay ang iyang inahan sa maong lalake. Klaro nga nadungog ni Wendel ang gipamulong sa lalake.

"Karon nga bag-o lang ko nga nabiyudo, Nor, panahon na nga masayod si Wendel nga ako ang matuod niyang amahan, ang nagpaka-Santa Klaus ning paskoha...!"

Nagpitokpitok ang mga mata ni Wendel. Si Noy Arsenio, ang negosyante sa ilang barangay nga maoy tag-iya sa dakong convenience store nga bag-ohay lang nabiyudo, mao diay ang iyang amahan? Ug ning Paskoha, bisan sa lapyo pa niyang kaisipan, nasabtan ni Wendel, ngano nga gilimod sa iyang inahan ang matuod niyang amahan, sulod sa daghang katuigan.  (Kataposan)

 

ANG APAN DIHA DINHI IYANG NGA PASKO QUOT SANTA KLAUS SI NOY ARSENIO WENDEL
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with