Igsuon sa abogado

Sugilanon - Atty. Conchito E. Germino (Banat) - October 1, 2015 - 10:00am

Hain man ang imong panotaryohan? matud ni Atty. Isaac Ganso pagsulod sa iyang manghod nga si Samuel sa iyang bupete ning sayo nga kahaponon.

Nianang buntag, nagteks daan si Samuel sa maguwang nga naa siya’y panotaryohan. Unya nihangyo nga di siya pabayaron og notarial fee kay igsuon.

“Himuonon pa,” ni Samuel nga naghayon lang nga nilingkod sa lingkuranan dikit sa lamesa sa abogado.

Nakapangawot sa ulo si Isaac. Kay kining iyang manghod, burokento pa sa abogado. Ganahan makakita’g away kay nagsalig nga may igsuong abogado.

“Unsa may imong ipahimo?” “Affidavit-Complaint.” “Kinsa may imong ikiha?” “Si Owen Ogam. Kay gibaharan ko nga patyon,” nakapanglingo si Isaac.

Silingan nila si Owen. Dili bayolente nga pagkatawo. Ikalima na ni nga silingan nga nakaaway ni Samuel. Lima na siya ka tuig nga nagtrabaho sa usa ka banko sa Saudi Arabia.

Kada bakasyon niya sa Pilipinas makakita g’yud og away. Tungod sa iyang kagarboso ug ka mapahitas-on. Dili gusto nga libakon nga palikero.

Bisa’g may lima na ka pinaangkan, mao nga wa’y matigum sa iyang suweldo.

“Abi nimo, ang balaod sa criminal procedure, nagmando nga kun may mopasaka og kaso nga kriminal, adto g’yud notaryohan ang affidavit-complaint sa Prosecutor’s Office, kon Piskaliya. Ma-dismiss ang kaso kun private lawyer ang monotaryo,” pasabot ni Isaac sa manghod. “Himoi lang ko. Inig kahuman, moadto ko sa Piskaliya,” ni Samuel.

“Sayonsayonon lang g’yud niya’g sugo ang abogado!” sa hunahuna ni Isaac. “Ayaw na lang ko hagohagoa sa imong kaburokento. Adto na lang didto pahimo sa Piskaliya.

Sukad karon, di na ko manggilabot anang imong mga kaso,” pintok nga balibad ni Isaac. Nitagam siya. Kay sa upat ka kaso nga iyang napasaka ayuda sa manghod, gibungatan ni Samuel og dagko nga kantidad ang mga gikiha para sa areglo. Wa’y nakabayad apan nabasura gihapon ang mga kaso kay wa’y nanistigos pabor ni Samuel. Si Isaac lang ang naulaw.

Nagminghoy si Samuel ug huyhoy ang abaga nga nibiya sa bupete sa igsuon. Nagpanglingo si Isaac nga nisunod og tan-aw sa manghod.

Wa na niya paundayoni ang manghod nga nisamot ka hambogero nga may igsuong abogado. (Kataposan)

 

 

ACIRC ANG DILI ISAAC ISAAC GANSO NGA PISKALIYA SAMUEL SAUDI ARABIA SI ISAAC SI OWEN OGAM
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with