Negosyo sa disgrasya

Sugilanon - Atty. Conchito E. Germino (Banat) - February 27, 2015 - 12:00am

Brod! Unsa may imong gitan-aw diha?” Nahapugwat si Atty. Bert. Codcoran pagkadungog sa tingog sa lalaki. Gilili ni Bert ang paksi nga usa ka dangaw sa bumper sa Toyota Corolla nga abuhon.

Unya nanaug ang lalaki paghuman niya’g parking sa iyang sakyanan sa tuo sa kotse. Ang sakyanan ni Bert nagparking sa dapit sa wala sa kotse. Nia sila sa basement parking area sa Santo Domingo Academy diin nagtungha ang anak ni Bert. Alas kuwatro pa sa hapon mamuhi iyang anak. Siya ang tigkuha sa iyang kinamaguwangang anak nga si Ronald nga nagtungha sa grade three. Karon alas tres i medya pa kay sayo nahuman ang iyang bista.

“Akong gilili pag-ayo ang damage sa kotse. Kay naatrasan ni nako tulo ka bulan na ang nakalabay. Nibayad na ko, apan wa gihapon gipa-repair” ni Bert. “Naatrasan sab ni nako, upat ka bulan na ang nakalabay. Nakabayad na sab ko’ sa lalaki. “Kun mao na, ikaw tingale ang naka-damage ana. Dili diay ako!” ni Bert. “Maru kaayo ang babaye nga nagdrayeb ana. May anak nagtungha dinhi.  Nagkatupad mi’g parking usa ka hapon. Niatras siya, abi nako’g nibiya na sa parkingan. Nipaluyo lang diay sa akong sakyanan. Pag-atras nako nga way tan-aw-tan-aw, igo dayon. Gipadad-an ko’g demand letter sa iyang abogado. Nibayad ko aron way samok” sa lalaki.

“Pareha sab sa nahitabo nako” ni Bert. “Pilay imong nabayad?” “P1,800. Imo” “P3,500. Nganong katunga ra man imong nabayran?” “Pagkahitabo, akong gihatag tarheta. Patawgon lang nako kun pilay estimate sa bayranan pag-repair. Kay mobayad ko’g katunga. Nisupak siya. Ngano kunong tunga lang akong bayran nga ako may nakaigo. Giingnan nako siya nga kun danghag ko, danghag man sab siya nga nibalhin og parking sa akong luyo. Niingon siya, abogado sab ang tag-iya sa kotse. Tawgon lang kono ko sa abogado” ni    Bert.

“Unya, gitawag ka?” “Gitawag. Unya akong giingnan nga katunga akong tanyag sa areglo. Kay dili maayo nga magkinihaay personalan ang duha ka abogado sa usa ka gamay’ng butang. Nisugot ang abogado” ni Bert.

Unya may laing lalaki nga niduol sab sa kotse human nakaparking sa iyang gimaneho nga sakyanan. Nilili gihapon sa bumper sa kotse ug nagpanglingo. “Unsa may imong gilili bay?” ni Bert. “Magsurok gyud akong dugo magtan-aw ining kotseha.

 Nakabayad ko’g tres mil kay napaksi ang bumper nga naatrasan nako. Usa ka buwan na ang nakalabay. Hangtud karon wa gihapon gipa-repair” sa bag-ong niabot nga lalaki. Nahingangha ang duha nga nauna. (Kataposan)

 

 

AKONG BERT NAKABAYAD NAKO NIBAYAD SANTO DOMINGO ACADEMY UNYA
  • Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with