USB
Sugilanon - Apronianito F. Miramon (Banat) - November 10, 2014 - 12:00am

“Hoy Nito! Bangon diha!” maoy namat-an nako ang langgis nga hulbaw ni Ate Zosima, akong magulang nga babaye.

“Uhum...” naghuyatid ko ug nanghuy-ab nga halos di ko pa mabuka ang akong mata. Kay tiaw mo’y hapit na man to mabanagbanag sa akong paghiuli gikan nga nag-internet.

Iya kong gisindol gamit ang tuo niyang tiil. Napugos ko pagbangon. Unya girapido dayon ko niya og  kasaba.

“Tan-awa ra gud ning imong gibuhat sa akong USB!”, padayon ni ate.” Na-virusan ni, unsa? Corrupt na gud ang akong mga file.”

Wala pa gani ko katubag sa iyang pangasaba nga pangutana, nagpusot-pusot na ang mga pulong nga nanggula gikan sa iyang baba. Mora gyud siya og dragon nga talibugwak og kalayo.

“Bisan asa man gud ning USB nimo ipasok,” mikibot iyang baba nga morag lubot sa himungaan nga kaitlogon.”

“Mao gyud ka! Di kakita-kita og bangag sa CPU nga para USB ipasok dayon nimo! Bisa’g asa nga internet cafè nga imong masudlan, hala pasok dayon sa USB! Unya unsaon na man ni ron?”

Ingon sa nagbukal gyud iyang dugo sa kalagot nga nagtan-aw nako. Morag tigre nga humahambat. Wa ko na lang siya tubayi kay gibati na ko’g kaulaw, kay sigurado man gyud nga nakabati ang among mga silingan, tungod sa kabanha. Tinuod man sab iyang gipanulti mao nga di na lang ko molalis.

Ambot ba uy nga grabe man gyud nako nga pagkaungo aning internet. Unya kay wa man koy kaugalingong USB, mao nga kining kang Ate maoy akong gamiton.

“Giingnan na baya tika nga dili ipasok ning USB bisa’g asang internetan, wa gyud ka patoo.”

Ni-rewind na pud! Mao nga milakaw ko kay alingogngog kaayo.

Gitayming nako nga nakalakaw na si ate usa ko mouli, kay panggabii man iyang duty sa Mepza.

Mingaw ang balay sa akong paghiabot. Ingon sa wala’y tawo. Apan paglili ko sa kusina maoy akong nakita si Kuya Roger (bana ni ate Zosima) nga dihay gibuhat. Wala siya makamatikod sa akong paghiabot. Nagtunaw siya’g sabong perla diha sa tubig ug unya giinom. Pagkahuman, iyang giyak-an ang butong-lubi nga dihay gamay’ng bangag, human niyang dangdang sa kalayo. Taud-taod mitumar siya’g tabletas nga inoflox.

Nakapanglingo ko sa akong nakita. Kataw-onon ko nga naglagot kang kuya Roger.

“Pastilan! Wa gyu’y kalibutan si ate Zosima nga bisa’g asa ra sab diay ipasok ni Kuya Roger ang iyang USB...” nako pa sa hilom. (Katapusan)

AKONG ATE ZOSIMA HOY NITO INGON IYANG KUYA ROGER MAN UNYA
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with