Mga tunob

Ning buntaga, miliraw na usab ang akong mga mata nga milingkod na sa naandan kong puwesto sa dalan Colon. Sa nagkuros nga mga eskina ug sa daplin sa mga aseras, naaninaw ko ang ambahan sa mga tawo nga pulos nagdali ug nagbahasbahas paglakaw-ngadto sa tagsatagsa ka destinasyon sa panlimbasog ug panginabuhian.

Maoy nasulod sa akong pandungog ang bosina ug sirbato sa nagkadaiyang sakyanan, ang nagkalandrakas nga hinagtob sa nagkalainlaing mga tiil nga nagbilin og mga tunob sa kadalanan. Nagwakat ang mga tunob nga gihulma sa nagdaling mga tiil -- paingon ngadto, nganhi, padulong sa lainlaing eskina dinhi ning magahob nga dakbayan.

Mga tunob nga nahulma sa dalan Colon nga gidisenyohan sa nagkayamukat nga talan-awon nga kanunay kong masaksihan, isip reyalidad sa pagpakabuhi sa tawo.

“Esnatser...!” Singgit sa usa ka batan-ong babaye nga gilabnihan sa iyang mahalong kuwentas sa liog.

“Mangunguot! Mangunguot....!” tingog sa usa ka senior citizen nga lalake nga nakuotan sa iyang pitaka sa bulsa sa karsones.

“Sir!Dunay bag-o, guwapa, bigot ug batan-ong tsiks...!’ sa bugaw’ng lalake nga abtik kaayong mosugat sa mga lalake sa dalan Colon.

“Ayaw tawon ko’g pamultaha, Sir! Nagdali man gud ko nga di maleyt sa akong trabahoan o sa among eskuylahan....!” pangaliyupo niadtong trabahador o estudyanteng nagdali, nga nadakpan sa istriktong traffic enforcer nga nakalapas sa ordinansa sa jaywalking.

Hilom kong nakapanglingo sa tanan kong nasaksihan sa dalan Colon. Nagkalandrakas ang mga tunob nga mihulma sa labing karaang dalan sa siyudad sa Sugbo sa mga tunob nga gibilin sa nagdaling mga tiil paingon sa maayo o dautan nga sangpotanan.

Sa matag adlaw, dinhi lang kutob ang akong mga tunob ning naandan kong puwesto sa aseras sa dalan Colon sa pagpanindag sitsireyas, alang sa lahutay’ng panginabuhian nga ikabuhi sa pamilya, sa tinarong nga paagi! (Kataposan)