^

Upa

Sugilanon - Fred Fuentes Monternel - Caduawan, Tabogon, Cebu (Banat) - July 17, 2014 - 12:00am

Hilabihang lipaya ni Christopher ning udtoha nga nakahigayon og pamisita kang Lingling. Giatol gayud niya nga bag-o lang nakalakaw ang Papa ug Mama sa dalaga nga tingob mangompra sa kunsumo sa lungsod.

Managsilingan silang duha ug parehas nga mga bugtong anak. Hilom nga nauyab ni Christopher si Lingling. Sa edad nga 16, parehas silang bag-o lang naka-gradwar sa publikong hayskol sa ilang baryo, kinawat-kawat ang pagpamisita ni Christopher sa balay nila ni Lingling.

“Marukoy gyud ka kaayo, Chris! Igo lang gyud nakasakay sila’s Papa ug Mama sa dyip pasaheroan paingon sa lungsod ning udtoha, mipuli dayon ka’g pamisita nako...!”

“Mingawon ko kun dili ka ikasulti, karon nga uyab na gyud ta, Ling!” nagkihatkihat si Christopher nga sikit kaayong mitupad og lingkod kang Lingling sa lantay’ng kawayan, simpig sa bentana.

“Di pa ra ba gusto sila’s Papa Marman ug Mama Lita nga manguyab ko, Chris! Gusto nila nga patapuson ko’g eskuyla sa kolehiyo sa kursong pagkamaestra...!”

“Hasta sab sila’s Papa Boy ug Mama Ipen, dili sab gusto nga manguyab ko. Gusto silang pakuhaon ko’g kursong Accountancy aron mahimo kong CPA damlag!” ni Christopher ngadto kang Lingling nga may gitudlo lahos sa bentana.

“Unsa man nang gitudlo mo, Chris....!” matud ni Lingling nga milantaw sa bentana, ngadto sa unahan.

“Tan-awa ra ang binuhian kong sunoy! Mibirig sa inyong dumalaga, Ling!”

“Hala, kaupahon ang imong sunoy, Chris, sa gigalam kong dumalaga!”

“He-he-he! Parehas man sa atong kahimtang ang sunoy ug dumalaga sa atbang, Ling...!” ni Christopher nga migakos dayon sa dalaga.

“Hep! May limitasyon ang atong panag-uyab, Chris! 16 anyos pa ta! Mopadayon pa ta’g tungha sa kolehiyo...!” “Aw, kiss-kiss ug gakos-gakos lang god ta, Ling! I love you....!” hunghong ni Christopher nga hugot migakos na sab kang Lingling ug mihalok sa mga ngabil sa dalaga.

“C-Chris....!” miagumod si Lingling nga nakatilaw sa unang lips-to-lips ni Christopher nga daw giganahan. Nag-inukobay ang ilang mga ngabil.

“Puslan man, magpinarehas tas akong sunoy ug imong dumalaga sa atbang ning bentana, Ling....!” ni Christopher nga milunga paghalok kang Lingling ug milantaw sila lahos sa bentana. Sa unahan, maoy nasugat sa ilang panan-aw ang paspas nga pag-upa sa sunoy ngadto sa dumalaga.

Gikihatan ni Christopher si Lingling nga makahuloganon kaayo. Apan naglingolingo ang dalaga. Hugot nga mibalibad sa hangyo ni Christopher. (Kataposan)

APAN CHRIS LINGLING MAMA IPEN MAMA LITA PAPA BOY PAPA MARMAN
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with