Hinuon, wala na si Rey magdahom ni magpaabot nga magkasugat pag-usab ang duha nila ka dalan. Dili na siya magpakita kang sister Veronica aron maalim sa hingpit ang samad sa iyang kasingkasing. Igo na alang kaniya ang paghandom niini. Malipayon na siya nga mamalandong nga kausa niana iyang gitaya ang iyang kinabuhi tungod sa babaye nga iyang gihigugma.
Pasado na alas onse sa gabii sa pag-abot nila sa Isla Paraiso. Nanaog gilayon si Rey sa pump boat.
“Pag-ayoayo dinhi, Bay,” matud sa iyang higala.
“Daghang salamat, Bay,” tubag ni Rey.
Ug nagpig-itay sila sa kamot.
Sa dihang nananghid na ang iyang higala nga mobalik na sa siyudad, gipahimangnoan kini ni Rey nga kun mahimo dili kini mosugilon kang bisan kinsa nga ania siya sa Isla Paraiso. Wala na magkutikuti pa ang iyang higala. Misanong kini ug mipasalig sa pagtuman sa iyang gihangyo.
Ug wala madugay, mibiya ang pump boat nga gisakyan sa iyang higala sa isla. Nahabilin si Rey nga nag-inusara taliwala sa mamingaw nga kagabhion.
Niadtong gabhiona usab, si sister Veronica didto sa iyang lawak sa kombento wala makatulog. Naghiwasa siya. Si Rey ang kanunay diha sa iyang hunahuna. Hangtod karon gisaog gihapon siya sa kabalaka. Unsa na kahay kahimtang karon ni Rey? Hain na man kaha kini karon? -- Sumpayan pa