Abogadong mapaubsanon

May magsoon nga kanunay maglalis. Magpalabwanay sa kaalam. Di man hinoon mag-away nga magdinapatay. Mosangko usahay sa pag-insultuhay. Apan kasagaran, ang manghod mao na lay magpaubos. Magpapildi sa lalis aron way gubot.

Mao ni ang kahimtang nila ni Dennis ug Denver. Duha ra silang magsoon. Si Dennis, maguwang og duha ka tuig, usa ka pulis. Si Denver usa ka abogado. Pulos pa sila ulitawo. Napulo ka tuig na nga pulis si Dennis. Duha ka tuig na nga nanglaban si Denver.

Tungod sa trabaho sa pulis, sinati sab ni Dennis ang Revised Penal Code, balaod mahitungod sa mga krimen. Usahay mopaagi lang og pangunsulta si Dennis sa manghod, unya magsugod dayon ilang lalis.

“Giunsa man nimo pagpasar sa bar nga wa ka man kahibawo ining balaora?” kantalita nga pangutana sa maguwang.

“Kun dunay abogado nga suheto sa tanang balaod, mobilib ko ana niya. Pero sa akong bahin, ang akong gitun-an, ang mga balaod nga igo ra makapasar nako sa bar exams. Total, kun manglaban ko, puwede man magdala’g kodego sa husgado.  75% nga wa nako masayri. Niining bahina, puwede ko mo-refer nimo, Manoy” ni Denver nga mapahiyomon.

Nakapahiyom sab si Dennis. Kay bisa’g abogado na iyang manghod, wa nidako ang ulo. Mapaubsanon lang gihapon. Wa nausab ang kinaiya.

“Bilib ko nimo, Ver. Mapaubsanon gihapon” ni Dennis.

“Unsa may makuha nako sa pagpataas? May limitasyon man gyud ang kaalam sa tawo” ni Denver. Nag-apir sila.

“Ambot kaha’g ako pay naabogado no?” ni Dennis. “Padayon hinoog abogasya. Ipahuwam nako nimo tanan nakong libro!” ni Denver.

Namid-ok ang maguwang. Nasayod siyang di niya kaya ang gibuhat sa manghod sa  pagdukot sa pagtoon. (Katapusan)