Mibalik si Modisto mangtas

Human nila itambog sa dagat ang patay’ng lawas ni Modisto, silang tanan nagtuo na gyud nga dili na kadto mabuhi pa si Modisto. Mao man goy ilang gikasabutan nga ilang patyon si Modisto kay mao kini ang mangtas nga nagsige’g pamalbal sa mga lumolupyo dinhi sa sityo Ngitngit-Buwan. Kay matud pang padre Marko, ang kura paroko sa lungsod si Modisto mao ang anak ni Versikulo, ang labing mangtas nga ungo didto sa isla Tabontabon.

Ang mga silingan mituo sa gisulti sa pari ug maong nagplano silang tanang mga lumolupyo nga ilang hiposon si Modisto, kay klaro na kuno kaayo nga dihang nahiabot kini dinhi sa ilang sityo daghan na kaayong gipamalbal.

Mabatan-on man o tiguwang, dalaga man o ulitawo, o bisan gani mga hayop nila, suyopan sa mangtas sa dugo. Ug karon nga wala na si Modisto, mora’g linaw na ang ilang sityo, apan gibati sila’g kabalaka kay may anak si Modisto nga nahabilin nga nagpanuigon pag-onse anyos, si Dilay. Luoy kaayo kini sukad nga ilang gitambog ang lawas ni Modisto sa dagat, magpangayo na lang ang bata og mga pagkaon sa mga kabalayan dinhi sa baryo. Dunay dili mohatag kay lagi anak kuno og ungo, apan duna usay malumo og kasingkasing nga mopakaon sa bata. Nagkalago ug nagkamuritsing na lang intawon si Dilay nga way nag-atiman sa pagkaligo. Unya may naluoy sa bata nga misagop niini ug didto kini papuy-a sa ilang balay ug kini mao si Marining ang dalagang guwang sa sityo Bulalakaw.

“Sukad karon, anhi ka na dinhi, ha, sa amo, Dilay,” ni Marining pa ngadto sa bata nga mipahiyom.

Buotan si Dilay ug sukad nga nia na kini dinhi sa balay sa dalagang guwang, kaabag na niya kini sa iyang mga bulohaton labi na sa pagpaninda’g pinisi dinhi sa sityo.

Apan sa gibuhat ni Marining may hilom nga naglaraw nga patyon si Dilay ug kini mao si Adiong, ang bilyakong sugarol dinhi sa sityo. Naibog  siya kang Marining ug aron walay makakita sa pagabuhaton unya niya kang Marining nga mao ang pag-angkon sa katahom niini, iyang unahon og patay ang bata. Iya usab kining itambog sa dagat sama sa ilang gibuhat sa amahan niini nga si Modisto.

“Kinahanglan kining mamatay usab kay ungo kining bataa, anak gud kini’g ungo, busa, ungo usab kini siya,” ni Adiong sa hilom.

Tuod, dihang gidala na ni Adiong si Dilay sa baybayon ug aron isakay sa iyang sakayan ug unya adto niya kini itambog sa may lawod nga dunay daghang iho, kalit lang may mitugpa sa likod ni Adiong ug nakurat siya. Ug sa iyang paglingi maoy mibantang sa iyang panan-aw si Modisto nga nagtutok kaniya sa tinan-awan nga dunay kaligutgot.

“Pagka wala ninyoy balatian, way kaluoy, hasta ang akong anak nga bata pa intawon kaayo inyo pa gyung patyon?” ni Modisto pa kalit lang nausab ang hitsura. Usa na ka mangtas si Modisto. Ug unya iyang gibugno si Adiong hangtod nga nakuniskunis ang lawas niini.

“Tay, tay, buhi ka diay, mingaw baya ko nimo, Tay,” ni Dilay pa ngadto sa amahan.

“Oo, buhi ko, Dilay, anak, kay dili mamatay si tatay nimo Modisto, tungod sa gahom sa kaliwat,” niini pa nga migakos sa anak ug unya gigakos niya dayon.

“Tay, naa man ko puyo ila ate Marining. Buotan kaayo siya, tay, iya ko gipapuyo ila balay ug busog ko kanunay lamiang pagkaon...” sa bata pa.

“Tana, atong adtoon si ate Marining, anak, magpasalamat ko sa kaayo niya nimo. Unya inig ka human dad-on ko na ikaw sa isla, sa isla Tabontabon, diin ko magdako...” ug kalit lang milukso si Modisto nga nagkugos kang Dilay nga mora’g naglupad. (Kataposan)