_banat
^

Banat Kalingawan

Pagbag-o sa Pasko

Dodong Espanol - Banat

 â€œNganong motagad man ka anang mga tawhana? Mga basurero man na sila! Wa man kay makuha ana nila!” ni Lina Tibon kapikas ni Ritche Tibon nga nagmaneho sa kotse ilang gisakyan.

Nasugatan nila karong buntaga sa karsada ang garbage dump truck sa baryo Idrobo. Nagmaneho si Ritche sa iyang Toyota Corolla nga abuhon. Si Lina tupad niya sa front seat. Istrikta ug matapobre si Lina nga usa ka doktora. Kauban sila sa klinika, ni Ritche nga usa sab ka doctor.

Gibusinahan ni Ritche, gipasigahan sa suga ug giwarawarahan niya sa walang kamot ang mga nagsakay sa dump truck pagdayong saylohay sa duha ka sakyanan.

“Maayong buntag doc!” hapit magdungan og pagtimbaya ang tulo ka nagsakay sa dump truck.

Sila si Roy, drayber, Wilben, truck boy ug Fernando assistant truck boy. Mapahiyumon sila. Ug mapasegarbuhon nga nakaamigo og usa ka propesyonal.

“Motagad o mangamigo lang diay ka’g tawo kun duna kay makuha niya? Giila ko lang silang silingan kay hapit kada buntag magkita man mi sa basketbolan sa atong barangay. Tigbasketbol gud ko didto mabuntag. Sikbit man sa basketbolan ang grahean sa dump truck’’ pasabot ni Ritche.

Wa nitingog si Lina. Nitan-aw sa unahan nga mora’g nangyamiid.

Bag-ong minyo sila’s Lina ug Ritche. Wa pay anak. Kaklase sila sa medical school. Dungan sila’g gradwet. Dungan sab og pasar sa board exams. Apan lainlain sila’g specialty. Cardiology ug Internal Medicine kang Lina. Si Ritche hilig og Neurosurgery ug Pediatrics. Nindot ang kombinasyon sa ilang mga linya. Nikabig sila’g daghang pasyente. Maayo’g kita ilang klinika sulod sa tulo ka tuig gikan sa pag-abli niini.

Apan managlahi ilang batasan. Si Ritche hingamigo. Motagad sa tanang tawo. Maadunahan o makabos. Ug mas ganahan siyang makigsood og mga kabus. Si Lina  mga propesyonal ug adunahan ra’y iyang tagdon ug higalaon. Wa pa sila’y usa ka tuig nga nagpuyo sa baryo Idrobo. Mag-unom ka bulan sila karong bisperas sa Pasko. Karong buntaga, padulong sila sa ilang klinika. Tagsa sila’g kotse. Kamao sang momaneho si Lina. Apan kun tapulan siya’g drayeb ug ganahan magdaginot og gasolina, mag-usa lang sila’g sakay. Pero sa panahon nga mobisita sila’g pasyente sa ospital, anha na sila maglainlain og sakay.

Usa ka buntag, nagmaneho si Lina sa iyang kotse nga Honda Accord nga asul, kay mobisita og pasyente sa ospital. Si Ritche niuna’g lakaw kay may sayong gibisitahan nga pasyente. Samtang nagdungan ang Honda Accord, nikalit lang og kurog ang dinaganan. Mora’g nahimong batoon ang karsada nga hamis ang pagkaespalto. Nahinumdom si Lina nga ingon ini ang lihok sa sakyanan kun may maplat nga ligid. Nipadaplin siya sa too ug gipahunong ang sakyanan. Nanaug siya ug gilili ang mga ligid. Plat ang too nga ligid sa atras.

“Bida! Dinhi pa gyud ko’s awaaw nga lugar naplati. Way masampit!” ni Lina nga hapit kapamalikas. Unya may niurong nga dump truck sa luyo sa iyang kotse.

“Asawa man kang Doc Ritche ma’am no?’ ni Roy.

Niyango lang si Lina. Wa nitingog kay gisapot.

“Dali mo bay! Tabangan nato si ma’am. Kita’y moilis og ligid sa iyang kotse”, ni Roy.

“Ipagawas ang jack, tayring ug reserba ma’am”, ni Wilben.

“Kamo man diay”, diha na nitingog si Lina. Nipugos og pahiyom. Gihatag dayon niya ang yawe sa kotse ngadto ni Roy aron maabli ang baggage compartment.

“Ay’g kabalaka. Kay suholan ta mo”, ni Lina.

“Di mi pasuhol ma’am oy! Higala gud namo imong bana. Maayo kaayong tawo. Kundi pa siya maayo, labyan ka lang namo”, ni Fernando.

Nakapanglab-ok og laway si Lina.

Sa bisperas sa Pasko namalit og regalo si Ritche. Nikuyog si Lina niya sa Park Mall.

“Ayaw unyag kalimti sila si Roy, Wilben ug Fernando. Imong mga  higala nga mga basurero”, ni Lina.

“Ingon ka di sila angay tagdon kay way makuha nila”, ni Ritche. Naisang kilay. Daw nanudya.

“Nakaamgo na ko nga angay higugmaon nato atong silingan”, ni Lina. Nipahiyom. Wa na lang siya nihisgot adtong higayon nga naplat iyang ligid sa kotse.

“Di pa ulahi ang pagbag-o”, tuaw niya sa hilom. (Katapusan)

 

APAN FERNANDO HONDA ACCORD LINA RITCHE SI RITCHE SILA
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with