Perming palayason

Dear Tita Salie,

Maayong adlaw kanimo. Nagsige gyod ko og pangita ug naghulat gyod ko nga dunay magpadala og problema nga sama sa akong problema aron nianang paagiha akong masayran kun unsaon nako ang akong sitwasyon. Apan hangtod karon wala pa gyod nako masugati ang sulbad sa akong problema. Mao nga ako na lang kining gipadala kanimo aron imong tambagan, Tita Salie.

Tagoa lang ko og Mrs. Cancer, 27 years old, minyo ug dunay 2 kabuok anak. Ang akong problema mahitungod kini sa akong bana. Hilabihan ka palahubog ang akong bana, wala’y pakialam sa iyang pamilya. Mas taas pa ang iyang oras didto sa imnanan kay sa iyang pamilya.

Usahay bisan dili siya hubog gusto niyang mogamit kanako, apan tungod lagi kay kapoy na ang akong lawas ako siyang mabalibaran sa iyang gusto. Masuko dayon siya, Tita, ug iya dayon ko nga palayason. Permi ko niyang palayason, Tita, hubog man siya o dili.

Kundili pa lang ko maluoy sa among mga anak dugay nakong nilakaw. Kun ako lang ang pabut-on nilayas nako kay 8 years nakong nag-antos sa akong problema. Apan dili ko gusto nga ma-broken family mi. Unsa may akong buhaton, Tita? Palihog pasabta ko. Thank you.

* * *

Maayong adlaw, maayo na lang kay taas-taas ang imong pasensya ug nakalahutay ka sa walo ka tuig sa maong sitwasyon.

Maayo usab kay anaa kanunay ang imong kaluoy sa imong mga anak ug ang kahadlok nga ma-broken family mo. Kay kundili pa tungod niana dugay na gyod naguba ang inyong pagpuyo.

Ang akong papa mora og susama sa imong bana. Anaa kaniya ang pagkayawyawan, yawyawan pa siya kay sa akong mama. Apan bilib lang gyod ko sa akong mama kay kamao man siyang modawat sa mga yawyaw ni papa. Anaa kaniya ang pagka mapaubsanon kaayo. And of course, maampoon usab siya. Ug kanunay niyang gi-ampo nga mausab ang akong papa uban sa iyang kaugalingong diskarte.

Sulayi pagamit ang diskarte sa akong inahan. Gamita ang pa lambing effect. Kay alang kanako wala’y isug nga lalaki nga dili maluoy ug maapektohan sa usa ka paraygon nga babaye.

Ayaw tugbangi ang iyang kaisog aron dili siya musamot kaisog. Pabilin nga hinay ug paraygon ang imong tingog sa tanang panahon labina kun nasuko siya. Kulang lang ninyo ang sweet ug paraygon nga panagsultihanay.  Pagsul-tihanay gyod mo kanunay magsumbonganay mahitungod sa imong mga happy moments mga kahiubos aron malig-on pagbalik ang inyong relasyon. -- Tita Salie