Protesta

“Pildi man ko’g 184 ka mga botos sa akong kontra nga si Amboy sa pagkamayor dinhi sa atong lungsod tsk...tsk...tsk”, nakapanglingolingo nga namulong si Tiago ngadto sa iyang asawa nga si Bandat. Daw dili makatoo si Tiago sa iyang kaparotan sa miaging eleksyon kay sikit ra kaayo iyang nakuhang botos batok kang Amboy.

“Unya unsa may plano mo?”, nangutana si Bandat samtang nangandam sa ilang pamahaw.

“Mo-file ko’g protesta sa Comelec batok kang Ambrosio Demakulangan kay gitikasan ka sa PCOs”, tubag ni Tiago.

“Oy!, lisod man kang matikasan sa PCOs kay kumpyuter kon makina na gud na”, temang ni Bandat.

“Bisan pag PCOs na Bandat apan gidumala og gimandoan gihapon na ug tawo,” ni Tiago.

Mao tong pagkahuman sa ilang pamahaw, nag-ilis dayon si Tiago. Nag-longsleeve nga de kurbata pinaresan sa iyang slacks nga puti. Naa pay hinapay nga pinapilit gumikan sa pamadang gibutang. Moadto siya sa lungsod aron sa pag-file sa iyang protesta.

Pag-abot niya sa Comelec nasugatan niya ang iyang suod nga higala nga si Boboy.

“Bay Tiago dia ka man lagi, nag-unsa man ka dinhi?”, ni Boboy.

“Mo-file ko’g protesta bay’ batok kang Ambrosio kay nakadaug siya gumikan sa pagpanikas sa milabay nga eleksyon,” ni Tiago.

“Ha?, sigurado ka Bay?.... unya asa man kag sapi nga igasto sa imong protesta?”, nakuryoso si Boboy.

“Bahala na ni Bay basta mo protesta gyod ko ... tana Bay magkuyog ta sa sulod”, agni ni Tiago.

“Oy! Oy! Oy!... ta... taym pa ra gyod Bay Tiago, dugay kaayo ang desisyon sa Comelec nga moabot oy! Nalimot ka ni Congressman Tining Martinez niadto nga mi-file og protesta batok kang Benhur Salimbangon apan ang hukom sa Comelec ning butanga miabot lima ka bulan na lang sa dili pa moabot ang 2010 election?”, ni Boboy.

Ning puntoha kalit lang mihilom ang palibot. Wa dayon makabuhig estorya si Tiago. Nagpitokpitok iyang mga mata human sa iyang nadungog.

“May punto ka  sab bay... hurot-hurot na baya akong budget sa milabay nga eleksyon”, ni Tiago nga miaksyo’g kaguol ang panagway.

“Importante kaayo ron ang kwarta kun may lihokon ka apan kun wala ka gani yamo maypag magpuyo og magpaabot ka nalang sa sunod eleksyon. Kadali rang moligid ang panahon basin masuwertihan ka na sa sunod higayon”, tambag ni Boboy.

Nanghupaw og lawom si Tiago. Layo iyang panan-aw ug mikanayon, “Husto!, maningkamot na lang ko sunod eleksyon”, temang ni Tiago.

“Hehe, naa raman diay na bay’,... hala, dali na kay mangaon ta sa unahan ... manghigop ta’g init nga sabaw sa baka”, agda ni Boboy dayong agbay sa iyang higala paingon sa sikat nga kan-anan sa ilang lungsod!  (Kataposan)