_banat
^

Banat Kalingawan

Sa di pa matulog

Sugilanon - Dodong Espanol - Banat

Mora ma’g sakit akong cyst sa totoy. Maglisod man ko’g katulog ni Ayla ngadto sa iyang kapikas nga si June, tupad niya sa iyang wala sa ilang katre. Alas diyes na ron sa gabii. Human na sila’g tan-aw og telenobela. Mga magtutudlo sila sa saring publiko.

Sila na lang duha sa ila kay propesyonal na ug mga minyo na ang mga anak. Naglisod og katulog karong gabhiona si Ayla. Hapit usa ka bulan na siyang way tarong kinatulgan. Nabalaka na si June. Nahatotok siyas iyang kapikas sa toong kilid niya.

Nakapanghupaw si June. Nakasabot siya nga nagngutngot ang cyst ni Ayla sa walang totoy. Kaniadto, may cyst sab siya sa walang totoy. Pero dugay nang naoperahan. Daga pa siya sa pag-opera adto. Benign ang maong cyst. Dili cancerous. Apan kini karong cyst sa iyang tuong totoy, nahadlok na siyang paopera. Nahadlok siya nga kun tandogon, ma-cancerous hinoon.

Lahi man kaniadto daga pa siya. 23 anyos  pa siya sa pag-opera. Lig-on pa og lawas. Karon 55 na siya. Duha nay anak. Duha nay apo. May dayabitis. May hayblad. Unya sul-an usahay sa kasingkasing. Mo-palpitate. Kusog mopitik nga moduble o triple pa gani sa normal nga gikusgon sa heartbeat. Imbis 70 beats per minute nga maoy normal, moabot og 200 beat per minute kun mosuol. Maglisod siya’g ginhawa. Unya mosakit iyang dughan. Di siya maulian kun di dad-on sa ospital. Isulod pa gyud sa ICU. Unya dapatan og tambal nga mahalon kaayo. I-indyeksiyon sa iyang ugat ang tambal nga ginganlan og Adinosen.  P1,500 ang presyo sa usa ka vial nga kausa ra magamit.

Kay si June, na-admit sab lima ka tuig na ang nakalabay ug nakasinati sab og kahadlok sa kamatayon, gipasabot niya iyang kapikas sa iyang gibuhat. Naoperahan siya’g baga tungod sa pneumonia. Naputos sa plema iyang baga. Hapit sab siya mamatay. “Sukad nagawas ko sa ospital, akong gibuhat, sa kada gabii, inig katulog nako, magpasalamat ko sa Diyos sa akong kinabuhi. Unya mangayo ko’g pasaylo sa tanan nakong sala. Magsige lang ko’g balikbalik paglitok sa akong hunahuna sa pagpangayog pasaylo. Hangtud makatulog na lang ko. Kay maglisod man sab ko’g katulog” ni June nga nihapohap sa abaga ug bukobuko sa kapikas, kay nagtakilid man sa tuo nga daw nagtalikod niya. Wa lang nagtingog si Ayla.

“Inig ka buntag, magpasalamat ko sa Diyos nga nakamata ko. Ipakita pa gyud nako nga gusto pa kong mabuhi. Nagpasalamat ko sa tanang tipik sa akong lawas nga nag-function pa. Nagpasalamat  sab ko sa tanang maayong butang sa kalikupan, maayong panahon ug maayong mga isig ka tawo” ni June. Nagpanglingi sa kapikas nga nagpiyong bisa’g wa pa katulog. “Kun mahadlik kang mamatay, mamatay gyud hinuon ka. Ang maayo, magpasalamat kas Diyos nga gipahuwam ka’g kinabuhi. Nakasinati ka’g kinabuhi. Nakasinati ka’g kalipay ug kasakit. Sultihan nimo ang Ginoo nga kun bawion na nimo akong kinabuhi, salamat daan. Mao nay akong gibuhat. Unya, maayo ma’g resulta. Kay kun kanunay kang magpasalamat sa Diyos matag buntag inig mata nimo, patas-an pa man sa Diyos imong kinabuhi” ni June.

“Kay ang usa ka butang imong gihulaman, kun bawion nas tag-iya, kinahanglan magpasalamat ka. Unya moingon hinoon ang tag-iya, “Gamita lang una. Wa pa man na nako kinahanglana”.

“Mao sab ang kinabuhi. Aron di bawion dayon sa Diyos, pagpasalamat kada buntag sa pagmata nimo. Inig dayong katulog, pasalamat sab daan. Kay wa ka masayod kun kamata ka pa. Di ba kabantay ka nga bisa’g wa niingon ang Diyos nga di pa niya bawion imong kinabuhi, mabati nimo ang kapiskay? Mao nay akong sekreto sugod sa paggawas nako sa ospital. Lima ka tuig na gikan niadto. Gi-surrender ko na’s Ginoo akong kinabuhi. Maong wa na ko mahadlok bawion niya. Pagkatinuod, ang hinungdang maglisod ta’g katulog, kay mahadlok ta nga di na unya kamata inig ka buntag. Ayaw kahadlok. Fear of death is cause of death’ ni June. Daw nag-lecture.

Ug nakadungog siya nga nihagok si Ayla. Nakapahiyom si June. Ug gisugdan niya iyang tulomanon sa di pa matulog. (Kataposan)

 

AKONG AYLA DIYOS IYANG KAY KINABUHI SIYA UNYA
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with