_banat
^

Banat Kalingawan

Limbongan

Sugilanon - Dodong Espanol - Banat

Maayong buntag, Miss puwede ba mangutana? matud sa tawo nga suki ni Anita og Banat News. Niduol ang tawo sa newsstand niya sa eskina Banawa.

“Dili na ko miss, Sir, oy! Misis na ko” ni Anita nga nagpahiyom nga nagtunol og Banat News.

“Salamat” gidawat sa tawo ang mantalaan. Nikuot siya’g coins sa tuong bulsa sa iyang short pants. Ug gitunol ngadtong Anita. Gidawat niya. “Way sapayan” niya pa. Nihana og talikod. Apan niliso og balik.

“Maayo hinuon kay nisulti gyud ka’s tinuod. Hinaut unta nga mosulti sab ka’s tinuod inig tubag nimo’s akong ipangutana,” dugang sa tawo.

“Basta di lang binuang imong pangutana o dalang insulto, tubagon tika’g tarong,” ni Anita. Nagpahiyom nga nagtutok sa tawo nga nagbarog tungod sa newsstand.

Nasabot ni Anita nga mahigalaon ang tawo. Edukado og batasan. Desente’g panglihoklihok. Maayo’g kinaiya. Kay subra usa ka bulan na siyang tigpalitan og mantalaan ni Anita. Kada buntag sa alas sayis ang takna, kapin kun kulang, mag-hike siya kada-adlaw subay sa V. Rama Avenue. Muabot  siya’s Englis. Inig balik niya mohapit gyud sa newsstand ni Anita.

“Pila imong edad?” sa tawo. Nakapanglab-ok og laway si Anita. Kay sukad masukad, wa pa gyu’y lalaki nga nangutana niya ini. Apan di man tuod binuang pangutanaha.

“Nakapangutana ko nimo kay ang hitsura sa tawo limbongan man. Dunay batan-on pag hitsura, apan dako na’g edad. Duna say tiguwang nag hitsura, apan batan-on pag edad” sa tawo.

“Unsay buot nimong ipasabot, Sir?” ni Anita. Basta di siya ganahang motubag sa pangutana, tubagon niya’g pangutana.

“Ay lang pag-Sir nako. Puwede “Manoy” o “brod” ba hinuon” sa tawo. “Sa imong tan-aw brod, tiguwang na o batan-on pa ko?” ni Anita. Mauwaw mag-manoy sa ka-estorya.

“Mora pa ka’g 30. Pero puwede motug-an nga 25 pa,” sa tawo. Nilupa ang atay ni Anita. Nakatawa nga nanabon sa baba.

“Bitaw. Apan ako 56 na. Pero mora nag 66,” sa tawo.

Mora na man gani’g 70,” sa hunahuna ni Anita.

“May mga tawo nga di kamatikod nga tiguwang na sila. Usahay mag-manoy  o mag-manang sila’s tawo nga manghod pa nila’g edad” sa tawo.

“Sakit ra ba  kaayo nang manuyon o manangon ta sa tawo nga maguwang kaayo nato’g hitsura,” ni Anita.

“Sakto. Mao nang ako sa pagtungtong gyud nako’g 50, moingon na lang ko “bay” sa lalaki. Sa babaye, “miss”, sa tawo.

Mao diay’ng gi-miss ko nimo?” ni Anita, nihikohiko.

“Mas maayo pa, kay sa moingon ko nimo misis, unya miss pa diay ka,” sa tawo. “Nganong nakig-estorya man ka nako?” ni Anita. Giganahang nakighinabi. Labi na nga wa pay laing pumapalit.

“Malipay man gud ko kun may ka-estorya. Kay sa amo wa na man koy kaestorya. Mobaho akong baba kun di ko katabi,” sa tawo.

“Imo diay’ng misis?” ni Anita. “Akong misis di na mosulti’s tinuod. Wa na mi tingganay,” sa tawo. Subo ang nawong.

“Kana diay’ng mangatog na mo, di diay mo mag-estorya?” ni Anita. “Magdog mi. Apan magtalikod,” sa tawo.

“Ngano man?” ni Anita. Nakoryuso.

“Di na man siya pahikap nako. Moingon lang, hilashilas na. Kay tiguwang na ta. Unya hapit kada-gabii molakaw kay makigmadyong sa mga higala. Usa ka gabii akong giapas sa madyongan, wa didto. May hinunghong nako nga nakig-date og batan-ong lalaki,” sa tawo. Gibati’g kaluoy si Anita sa tawo.

“Daghan diay’g kuwarta imong misis?” ni Anita.

Nangahente siya’g yuta. Unya nagtudlo og Accountancy, CPA siya,” sa tawo.

“Ikaw, unsay imong trabaho?” ni Anita.

“CPA, sab ug nagtudlo sab og Accountancy,” sa tawo.

“Inyong mga anak?” ni Anita.

“Puro na propesyonal among duha ka anak. Mga minyo na sila ug naglain nag puyo,” sa tawo. Pareho sab diay sa mga anak ni Anita. Nabuhi lang siya sa survivorship pension gikan sa iyang bana nga military nga namatay in line of duty. Nag-sideline lang siya’g pamaligya’g mantalaan aron may kalingawan.

“Duna ra ba ko’y units sa Accountancy. Interesado unta kong mopadayon anang kursoha,” ni Anita.

“Ay na lang. Ako na lay mo-tutor nimo. Kana kun way magselos,” sa tawo. Daghan nang namalit og mantalaan.

“Mag-estorya lang unya ta’g usab,” sa tawo. Nibiya.

Gisundan og tan-aw ni Anita ang tawo. Macho gihapon og lawas. Di guwapo. Apan but-anon og nawong. Gibati siya’g kahinam sa iyang pagbalik. Singkuwenta na siya. Lima ka tuig nang biyuda. Di tingali dautan kun may makarelasyon na siya. (Kataposan)

ANITA APAN BANAT NEWS KAY SIYA TAWO
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with