Bugas nga gipanghatag sa Minglanilla baho?
CEBU, Philippines — Gireklamo sa mga taga Minglanilla ang bugas nga gipanghatag sa kagamhanan isip ayuda human nikuso-kuso ang bagyong Odette.
Una niini, si mayor Elenito Peña niapud-apod og tag 50 ka kilong bugas ngadto matag pamilya sa Minglanilla. Gani sila ra sa Minglanilla ang nihatag og tag 50 kilong bugas dili sama sa uban nga lugar nga tag 25 kilos o lima ka kilo matag panimalay. Apan pipila ka mga netizens ang nireklamo tungod kay ang ilang bugas nga nadawat “baho.”
Usa na niini si Kat Fernandez Sed, usa ka solo parent nga miingong “baho” ang nadawat nila nga bugas. Gisuwayan nila kini og pailis apan gibalibaran sila.
“Gikapoy namig pailis oy. Kapoy na sige’g reklamo ana ilang bugas,” tipik sa komento ni Kat Fernandez Sed.
Hinuon si Peña wa mihimakak nga aduna gyud bugas nga ilang gipailisan tungod sa kabaho. Apan siya niklaro nga kadtong mga “baho” nga bugas ila kining giilisan.
“Dili man gyud kalikayan nga sa pagkarga nabasa ba ron ang bugas,” asoy pa sa mayor.
Nagkanayon si Peña nga gisakyan sab dayon sa pamolitika sa ilang kaatbang ang ilang bugas nga gipanghatag.— IBM (BANATNEWS)
- Latest