2 patay sa aksidente sa motor

CEBU, Philippines — Duha ka tawo ang nakalas sa managlahing aksidente nga naglambigit og mga motorsiklo.

Sa lungsod sa Carmen, duha k motorsiklo ang nagkabanggaanay sa National Highway, Barangay Dawis Norte alas -4 sa kadlawon kagahapon, Lunes, Disyembre 22, 2025.  Ang nalambigit sa disgrasya mao ang Yamaha NMax nga gimaneho ni alyas Mar ug dunay mga angkas duha ka babaye nga nag-edad og 17 anyos ug 40-anyos, taga Barangay Suba, Dakbayan sa Danao.

Ang nakabangga niini mao ang usa ka Suzuki Smash nga gimaneho ni alyas Jun, taga Barangay Dawis Norte, Lungsod sa Carmen.

Base sa inisyal nga imbestigasyon sa Carmen Municipal Police Station ang duha ka motorsiklo nagbiyahe sa managlahi nga direksiyon.  Ang NMax paingon sa south direction samtang ang Suzuki Smash padulong sa north direction.  Apan pag-abot sa naasoy nga dapit ang Suzuki miliko padung sa wala apan nabanggaan kini sa NMax.

Ang duha ka drivers ug backriders sa Yamaha NMax parehong nangaangol ug gipangdala sila sa Cebu Provincial Hospital - Danao City apan ang driver sa Suzuki Smash gideklarar nga dead-on-arrival sa nag-atiman nga doctor.

Sa laing aksidente, patay ang angkas sa usa ka motorsiklo human sila nadisgrasya sa Barangay Banhigan, Lungsod sa Badian sa miaging adlaw.

Ang nadisgrasya nga motorsiklo mao ang Rusi motorcycle nga gimaneho ni alyas Mark, 29, taga Purok Malamboon, Barangay Alawijao, Lungsod sa Badian.

Angkas niya si alyas Fel, 19 anyos, Grade 9 nga estudyante ug taga Purok Malamboon, Barangay Alawijao, Lungsod sa Badian.

Sa imbestigasyon sa kapulisan sa Lungsod sa Badian kusog matod pa ang dagan sa motorsiklo gikan sa Barangay Poblacion paingon sa Barangay Aliwajao.

Basa ug dangog ang dalan niadtong tungora tungod sa pagsige og uwan, apan giingong kusog gihapon ang dagan sa motorsiklo.

Tungod niini, kalit nga nisukarap ang motorsiklo ug nalagpot ang angkas ug giingong nalamba sa usa ka punoan sa kahoy ug nakaangkon og kadaut sa ulo ug sa kalawasan.

Gidala ang maong angkas sa Badian District Hospital samtang ang driver wala na nagpadala sa tambalanan ug niuli sa ilaha. Apan ang angkas sa motorsiklo nakabsab gyud sa kinabuhi.

Nasuta imbestigasyon sa kapulisan pinaagi sa pamahayag sa saksi nga 16-anyos nga babaye nga ig-agaw sa namatay gikan sila nag-inom sa usa sa mga tindahan sa night market  Nibiya sila sa imnanan kay manguli na ang driver ug ang namatay unang nisakay sa motorsiklo ug nisunod ra sila.

Pag-abot sa lugar nakit-an nalang nila ang duha nga nagligdas na sa dalan kay nadisgrasya.