Mga tanod gigukod og sundang

CEBU, Philippines — Naglumba og dagan ang mga barangay tanod human sila gigukod og sundang sa ilang girespondehan diha sa Kasagingan, Barangay Lawaan 3, Dakbayan sa Talisay niadtong miaging adlaw.

Ang suspek nailhan nga si alyas Kim, 18 anyos nga nagpuyo sa nahisgutang lugar. Samtang ang reklamante ug midakop kaniya mao si Konsehal Rondy Lasola Abaquita.

Si Kapitan Frederick Marababol sa Lawaan 3 niingon nga nakadawat og tawag ang iyang konsehal nga si Abaquita, kinsa maoy chairman sa peace and order  may labot sa batan-ong nagdala og sundang ug gigukod  iyang maguwang.

Pag-abot nila ni Abaquita uban sa mga barangay tanod sa dapit sila nasab ang gigukod og sundang niini.

Matud pa ni Marababol nga napugos sila sa pagdagan aron dili maabtan sa sundang  ug mao na hinuoy matigbasan sa suspek.

Apan maayo nalang nga sa tantong alam-alam ug pagpahibalo nga nagpadulong na ang kapolisan, nakasabot kini ug nikalma ug ilaha kining nadisarmahan.

Matud pa ni Marababol nga daghan ang nalipay sa ilang pagsakop sa suspek tungod kay badlungon kini sa ilang dapit, gani nakadunggab na kini og silingan kaniadto apan nakabuhi rasab.

Sigon pa ni Marababol nga hilabtanon ug tiggamitan og ilegal nga drugas ang suspetsado.  Gidala nila sa buhatan sa kapolisan ang suspek ug gipaslak sa bilangguan.

Si Patrolman Raffy Rempojo, imbestigador sa kapolisan sa Talisay nitataw nga wala na mipakita og interes sa pagpasaka og kaso ang kihante tungod kay adunay mental illness ang dinakpan. IBM BANAT NEWS