Pletihan umentohan og P1

CEBU, Philippines — Nipadayag og suporta ang mga transport group nga CITRASCO ug PISTON-Cebu sa umaabot nga P1 nga umento sa plete sa mga pampasaherong jeepney (PUJ), nga ilang giingon nga dugay nang gikinahanglan tungod sa nagkataas nga gasto sa operasyon.

“Panahon na gyud,” matud ni CITRASCO chairman Ryan Benjamin Yu, nga mipasabot nga gawas sa padayon nga pagsaka sa presyo sa krudo, misaka usab ang ubang mga gasto sa operasyon sama sa maintenance, mga piyesa, ug adlaw-adlaw nga panginahanglan sa mga drayber.

Mipakita usab og suporta si PISTON-Cebu chairperson Greg Perez sa maong pamahayag nga mitumbok nga bisan og gikinahanglan ang pagpasaka sa plete, dili gihapon kini igo. Sa sayo pa, gipahibalo sa Land Transportation Franchising and Regulatory Board (LTFRB) nga andam na kini sa pag-apruba sa P1 nga across-the-board nga pagtaas sa plete sa PUJ sugod sunod semana, nga ilang gipasikad sa bag-ong pagsaka sa presyo sa krudo.

Apan, giklaro ni LTFRB Chairman Teofilo Guadiz III nga flat rate lamang kini nga pagtaas ug wala’y per-kilometer nga dugang, aron malikayan ang dugang nga kabug-at sa mga pasahero. The Freeman/IBM BANAT NEWS