Motorsiklo nabalitok, drayber patay

CEBU, Philippines — Patay ang driver sa usa ka motorsiklo samtang angol ang angkas niini dihang nadisgrasya ang gisakyang motorsiklo sa Provincial Road sa Barangay Bolocboloc, Lungsod sa Barili niadtong Domingo sa hapon, Hunyo 15, 2025.

Ang driver sa XRM nga motorsiklo mao si Alfred Ricaplaza Undang, 27, samtang ang angkas niya iyahang kaipon nga si Apsotol Wolfe, 22.

Base sa inisyal nga imbestigasyon sa kapulisan sa Lungsod sa Barili gikan sa Barangay Mantayupan, Lungsod sa Barili ang duha ug padulong na kini mouli.

Apan pag-abot sa kurbadahon nga dapit nawagtangan kini og kontrol sa gimanehong motorsiklo ug nalapos kini ug napidpid kini sa dalan hinungdan sa pagbalitok sa ilang motor.

Tungod sa kakusog sa impact, nalagpot ang drayber sa atubangan san aka-parking nga trisikol kilid sa karsada ug nakaangkon og grabeng kadaut sa ulo hinungdan sa hinanali niining kamatayon.

Samtang ang iyang kapuyo gidala sa Barili Infirmary Hospital alang sa pagpatambal apan gibalhin kini sa ospital sa Cebu City. — /IBM (BANAT NEWS)