“Triplets” gisud og plastic

CEBU, Philippines —  Tulo ka mga patay'ng puya nga gituohang ‘triplets’ nga gisulod og plastic container ang napalgan sa usa ka compound sa Purok Sibukaw, Barangay Cotcot, Lungsod sa Liloan niadtong Biyernes sa buntag, Hunyo 13, 2025.

Usa ka Naciansino Gunato Bazarte, 46, residente sa Barangay Cotcot, Liloan ug empleyado sa JIP Plastic ang nakakita sa maong mga puya.

Sa impormasyon sa Liloan Municipal Police Station Cebu Police Provincial Office gibutyag ni Bazarte nga alas 9 sa buntag sa samang adlaw gilain niya ang mga recyclable plastics.

Sa dihang giablihan niya ang blue plastic box didto niya nakit-an ang patay nga mga puya nga pulos babaye.  Kompleto na ang parte sa lawas sa maong mga puya ug matag puya dunay wristbands. 

Apan wala'y mga ngalan nga nakabutang bisan ngalan sa ospital o kaha birthing clinic. 

Ang tanang patay nga nga puya duna say clamps sa ilahang umbilical cords.  Dali dayon kining gi-report ni Bazarte sa management.

Nakig-alayon sab sa Liloan Emergency Risk Reduction and Management Council(LDRRMC), Municipal Social Worker, Barangay Health Worker aron mo-assist sa initial assessment apil ang pagdeterminar sa estimated gestational age sa mga puya.

Gi-contact sab ang usa ka local funeral parlor aron maatiman ang maong mga puya pinasubay sa public health ug safety protocols.

Matud pa ni  Police Staff Master Sergeant  Girlee Echalucesa sa Women and Children Protection Desk sa Liloan Police  Station nga sagol-sagol ang mga plastic gikan sa Bohol, Negros, Siquijor ug ingon man gikan sa Sugbo. Dugang pa ni Echalucesa nga maayo pagka-impake ang plastic container nga gisudlan sa tulo. Wala pa masuta kun ang tulo triplets o managsuon ba.

Ang kapulisan sa Liloan Police Station nga gipangulohan sa ilang hepe nga si Police Major Mawi  Arcillia dali nga nagpahibalo sa  Local Disaster Risk  Reduction and Management Council, Municipal Social Worker, ug ingon man ngadto  sa Barangay Health Workers sa pagtabang kanila aron matugkad kun asa kini gikan. (CEBU NEWS)