CEBU, Philippines — Hapsay ug malinawon ang mga kalihokan nga gihimo sa mga progresibong grupo ug labor groups atol na sa pagsaulog sa Labor Day kagahapon. Nagkalain-laing grupo ang nagmartsa gikan sa Plaza Independencia paingon sa dalan Colon, Dakbayan sa Sugbo diin aduna sila’y gipahigayon nga mubong programa nga gihimo dayon ang grupo nag-abot diha sa Fuente Osmeña alang sa ilang main program diin gipadayag ang ilang kasagmuyo ug yango-ngo sa administrasyon ni Presidente Ferdinand "Bongbong" Marcos Jr.
Matud ni Police Lieutenant Colonel Gerard Ace Pelare, tigpamaba ni Police Regional Office-7 nga bisan sa daghang grupo nga nisalmot sa kalihokan wala sila'y natala nga bisan unsa nga kasamok.
Apan naobsebahan sa PRO-7 nga adunay mga bata nga gidala sa ilang mga ginikanan ug gipaapil sa lihok protesta nga gihimo ug wala maghuna-huna sa kahimtang sa mga bata nga nabuwad sa kainit sa adlaw. Samtang sa Dakbayan sa Lapu-Lapu nagphigayon usab og mga kalihokan kagahapon diin lakip niini ang pagpanghatag og sweldo sa TUPAD beneficiaries sulod sa napulo ka adlaw nila nga trabaho.
Sa Dakbayan sa Mandaue, adunay gipahigayong kalingawan alang sa mga sakop sa Traffic Enforcement Agency of Mandaue TEAM) isip pagpasalamat sa ilang serbisyon ngadto sa mga Mandauehanon.
Adunay gihimong sports festival alang sa mga empleyado sa TEAM ug ang papremyo pinaagi sa raffles. Sa Dakbayan sa Talisay, nagpahigayon usab kini og mga programa sa pagsaulog sa Labor Day kagahapon. —Romeo T. Limpangog, Gabriel C. Bonjoc (BANAT NEWS)