Driver nga nakadisgrasya og senior citizen nasikop

CEBU, Philippines — Gitanggong na sa detention cell sa kapolisan sa Mandaue City Police Office (MCPO) ang drayber sa truck nga nagkarga og binugkos nga sin nga nangatagak nga nakaingon sa kamatayon sa 86 anyos nga biyuda nga naglakaw sa karsada niadtong Domingo.

Si Police Master Sergeant Melvin Leones, imbestigador sa Traffic Enforcement Unit sa Mandaue City Police Office (MCPO) miila sa biktima nga mao si Gregoria Cortes nga nagpuyo sa maong dapit.

Ang drayber sa truck de karga nga si Joel Estrella, 39 anyos nga taga Sta Cruz sa Lungsod sa Liloan dali nga gidakop sa kapolisan. Nasuta sa imbestigasyon nga nagdagan paingon sa pier area sa siyudad sa Sugbo ang truck nga gimaneho ni Estrella ug pag-abot sa dalan sa barangay Canduman naputol ang pisi nga gihigot sa binugkos nga sin hinungdan sa pagkatagak ug mitugpa ngadto sa biktima nga naglakaw daplin sa karsada.

Dali untang gidala ang biktima sa usa ka pribadong tambalanan apan gideklarar kini nga dead on arrival. (BANAT NEWS)