Tulo ka OFWs nakalusot sa Sugbo

CEBU, Philippines — Tulo ka Overseas Filipino Workers ang nakaabot sa ilang panimalay sa duha ka lungsod ug usa ka dakbayan sa Lalawigan sa Sugbo nga wala moagi sa sakto nga protocol.

Sa iyang matag adlaw nga Facebook live streaming, si Gobernador Gwendolyn Garcia nitug-an nga nasayran na lang niya nga niabot sa Sugbo ang maong mga OFWs pinaagi sa land trip.

Ang usa ka OFW taga barangay Dumlog, Dakbayan sa Talisay samtang ang duha taga Tudela sa Isla sa Camotes ug Samboan.

"Wa gyud mi mahibalo. Ni report na ang mayor sa Samboan nga kuno dunay moabot didto unya di siya modawat.

Ni-report ang mayor sa Tudela nga naa nay naghuwat kay moderetso na’s Tudela ug gani ang Talisay na deretso na, ang ni-report nako empleyado sa Capitol kay nagpuyo sa sama nga subdivision," matud ni Garcia.

Ang OFW sa Dakbayan sa Talisay adunay dala nga certification gikan sa barangat kapitan sa 667 Zone 72-District V. Ermita, Manila nga si Margarita Mendoza nga pagpamatuod nga ang maong OFW nakahuman sa 14 ka adlaw nga mandatory quarantine.

Clearance

Ang maong mga OFWs matud ni Garcia adunay clearance gikan sa regional director sa Office of the Civil Defense sa Region 5 ug sa Regional Disaster Risk Reduction and Management Council (RDRRMC) chair nga si Claudio Yucot.

"Mao ni nahitabo gikan sa barangay chairman, ang OCD-Region 5 ni-issue og certification. Tungod niini kay disaster regional chairman man siya gituohan sad sa police and coastguard, mao na nakapuslit naabot diri nato," matud ni Garcia.

Si Garcia nagkanayon nga wala may problema kung adunay OFW nga naglisud na sa iyang gitrabahoan sa gawas sa nasud tungod sa coronavirus disease pandemic ug gusto na mopauli sa Sugbo apan kinahanglan moagi sa sakto nga proseso ug protocol.

Sumala sa goberanador nga ang sakto nga proseso pagpauli sa OFW mao nga adunay certificate of quarantine gikan sa local health officer o Department of Health; kinahanglan adunay travel pass sa Bureau of Quarantine nga valid sulod sa 24-oras o hangtud makaabot sa destinasyon ang OFW; adunay travel authority gikan sa IATF susama sa 185 ka Cebuano seafarers nga gi-repatriate ug certificate of acceptance sa local chief executive.

"So I'm requesting our coast guard and our PNP to kindly increase monitoring because this could happen again,” matud ni Garcia.

Si Garcia niawhag sa mga polis ug local disaster officers nga kun adunay susama nga mahitabo sunod kinahanglan ipahibalo ug ipasabot ngadto sa mayor. /GMR (BANATNEWS)