Mga bata gidaro sa taksi
CEBU, Philippines – Tulo ka mga batang tinun-an ang nangaangol diin usa nila ang talandugon ang kahimtang human sila gidaro sa taksi nga ang drayber nakatagpilaw samtang nagmaneho diha sa Poblacion Pardo atubangan sa Pardo Police Station sa Dakbayan sa Sugbo.
Ang maong mga bata diha nanabok sa pedestrian lane sa dihang gidaro sa taxi nga padulong sa habagatan nga bahin sa Sugbo sumala pang Police Executive Master Sergeant Remel Chavez, Traffic Investigator sa Pardo Police Station nga gikahinabi sa Banat News.
Matud pa ni Chavez, gikan sa siyudad ang taxi nga gimaneho ni Norman Nacario ug pag-abot sa maong lugar nangangkon kini nga nakatulog ug wala makabantay sa upat ka mga tawo nga naglakip sa tulo ka mga tinun-an.
Sumala pa ni Chavez, gawas nga nadaro niini ang mga bata, nakadam-ag pa kini ug laing mga sakyanan lakip ang motor.
Dugang pa ni Chavez, ang duha ka mga bata nagpangidaron 5 ug 15-anyos anaa karon sa Cebu City Medical Center, samtang ang 11-anyos anaa karon sa intensive care unit sa pribadong tambalanan.
Ang driver nga si Nacario, nangayo og pasaylo sa nahitabo kay wa niya kini gituyo. Andam sab siyang manubag sa iyang nabuhat.
Si Kapitan Manolita Abarquez, nasubo sa nahitabo human nakita nila nga didto gayud sa pedestrian lane ang maong mga bata. Giawhag niya ang mga ginikanan nga ipagamit sa mga anak ang skywalk nga gipahimo para gyud paglikay sa disgrasya.
Magpabutang sab sila og rumble strips sa dili pa ang pedestrian lane aron ang giduka nga drayber makamata. Giawhag sab niya ang mga drayber nga kun giduka mopahuway nalang gyud. /IBM (BANAT NEWS)
- Latest
