Dugang 14 ka armas gitahan

CEBU, Philippines — Kapin 300 na ka mga armas ang nahipos sa Cebu City Police Office (CCPO) City Mobile Force Company (CMFC) gikan sa bukirang bahin sa Dakbayan sa Sugbo nunot sa kampanya batok loose-firearms.

Gibutyag ni CMFC Force Commander Police Lieutenant Colonel Randy Korret nga  niadtong Miyerkules dugang 14 ka mga nagkalainlaing armas ang gitahan sa mga residente nga naglakip sa mga pistola, rebolber, improvised shotguns, riple ug nagkalainlaing mga bala.

Sagad sa mga armas panahon pa sa Ikaduhang Kalibutanong Gubat nga kabilin sa ilang mga apohan ug gigamit nilang proteksyon batok sa mga armadong bandido ug mga rebeldeng komunista sa kabukiran kaniadto.

Nagtuo si Korret nga niboluntaryo pagtahan sa mga armas ang mga residente kay nawala na ilang kahadlok tungod kay naa kanunay ang presensya sa kapolisan ug sementado na ang karsada.

Padayon ilang panawagan sa publiko pagtahan sa mga tinagoang armas nga way mga lisensya ug di paabutong madakpan pa hinuon ug makasohan. /IBM (BANATNEWS)