CEBU, Philippines – Patay ang usa ka kanhi kapitan nga usa na konsehal ug ang anak usab niining konsehal sa barangay human silang duha gi-ambush sa mga armadong lalaki diha sa Barangay Kalumboyan sa Dakbayan sa Bayawan sa Negros Oriental.
Giila ang mga biktima nga sila konsehal ug kanhi kapitan Felipe Condes Jr., 60, ug anak niini nga si konsehal Geonesis Condes,31, taga Barangay Kalumtukan Dakbayan sa Bayawan.
Matud ni Bayawan City Police Station Chief Police Major Michael Aydoc gikan sa Poblacion ang duha ka konsehal sakay sa motorsiklo nga gimaneho ni Geonesis padulong uli sa ilang lugar.
Sumala pa sa kapolisan posibleng gisundan sila sa usa ka gituohan nga riding in tandem ug pagabot sa mingaw nga bahin sa nahitaboan gisikitan ang duh ug gipamusil.
Sa inisyal nga imbestigasyon sa kapolisan gituohan nilang personal ang motibo sa maong pagpamusil apan wala pa sila mohatag og dugang impormasyon kabahin niini.
Gibutyag usab ni Aydoc nga kanhi kapitan si Felipe Condes sa Barangay Kalumtukan sa Dakbayan sa Bayawan. Padayon pa ang hot pursuit operation batok sa mga mamumuno. (/IBM)(BANAT NEWS)