Nagbanhig sa seaman wala pa ilhi

CEBU, Philippines – Wala pa gihapon nailhi ang nibanhig patay sa kanhi seaman sa Barangay Pajo, Dakbayan sa Lapu-Lapu niadtong Lunes sa hapon.

Ang direktor sa Lapu-Lapu City Police Office, Police Colonel Clarito Baja, nagkanayon nga sa pagkakaron wala pa mailhi sa kapolisan ang riding-in-tandem nga mamumumo.

“Nagsubay pa mi karon sa mga CCTV, daghan man mga establishments sa lugar so basin naay nakakuha,” sigun pa ni Baja.

Sutaon pa sab sa mga imbestigador kun aduna bay dashboard camera ang sakyanan sa mga biktima.

Nasayran nga nakalas ang kanhi seaman nga si Irving Querubin, 49, residente sa Barangay Basak sa maong dakbayan ug naangol ang drayber niini human sila banhigi samtang nagsubay sa M.L. Quezon National Highway sa Barangay Pajo sa maong dakbayan.

Gikan si Querubin sa hearing sa kasong ilegal nga drugas niini sa Lapu-Lapu City Hall of Justice.

Una na nga gibutyag ni Baja nga nadakpan niadtong Agosto 1 sa ilegal nga drugas si Querubin ug nakapiyansa kini niadtong Agosto 4.

Sa pagkakaron wala gisalikway sa kapolisan ang anggulo nga may labot sa away sa ilegal nga drugas ang motibo sa pagpatay niini. (/GMR)(BANAT NEWS)