Sakop sa PIB nga gipangsuspenso, balik-serbisyo

CEBU, Philippines – Balik na sa ilang trabaho ang 18 ka mga gisuspensong polis nga sakop sa Provincial Intelligence Branch (PIB) sa Cebu Provincial Police Office (CPPO), apan ang direktor sa Police Regional Office-7 (PRO-7) miingon nga dili garantisado nga makabalik ang maong mga polis sa ilang naandang unit.

Nasayran nga girelibohan ang maong mga polisa human sa giingong ‘misencounter’ ug ‘miscoordination’ tali nila ug kang Police Corporal Feliciano Yballe Jr.

Sa press release sa kadagkuan sa kapolisan sa rehiyon, anaa sa Brgy. Sinsin, Cebu City nagtago-tago ang suspek nga mipusil patay sa operatiba sa PIB nga si Police Master Sergeant Junard Cinco ug nagpatultol ra unta sila kang Yballe, kinsang giingong suheto sa dapit.

Apan matud pa, mipabuto sa iyang armas si Cinco nga maoy hinungdan nga adunay nahitabong sinukliay og bala. Nunot niini, gisuspenso ang maong mga sakop sa PIB ug karon, human sa election period gipabalik na sila sa serbisyo.

Si PRO-7 director Police Brigadier General Debold Sinas nagkanayon nga ang bag-ong direktor sa CPPO na maoy modesisyon kon kinsa sa maong mga polis ang makabalik sa maong unit.

Subay niini ang bag-ong direktor sa CPPO nga si Police Colonel Roderick Devilles Mariano nagkanayon nga usa kini sa iyang tukion sa iya unyang paglingkod.

Samtang adunay usa ka kanhi opisyal sa PIB ug usa ka Police Non-Commissioned Officer ang gustong magparelibo gawas sa CPPO.

Apan wala gibutyag ni Sinas kon kinsa sila ug unsa ang ilang mga rason sa pagpaprelibo. Hinuon gitugotan sila ni Sinas aron magpabilin ang ilang kaikag sa pagpanarbaho. (/DILT)(BANAT NEWS)