SOCE ipasumitir sa dili pa ang deadline
CEBU, Philippines – Pila ka semana sa dili pa ang deadline ang Commission on Elections (Comelec) Cebu City, nipahinumdom kini sa tanang kandidato sa milabay nga national ug local elections nga mosumetir sa ilang Statement of Contributions and Expenditures (SOCE).
Si Comelec Cebu City South District Election Officer Atty. Marchel Sarno miingon nga kadtong mga kandidato nga midaug ug napildi, gikinahanglan mosumetir sa ilang tagsa-tagsa ka SOCE.
Kon mapakyas sila sa paghimo niini, mapahamtangan sila og silot kay usa kini ka election offense.
Sa mga first time violators, mobayad sila og administrative fine gikan sa P1,000 ngadto na sa P3,000; sa second time offenders multa nga P2,000 ngadto na sa P6,000 ug ma-disqualified sa paghupot og katungdanan.
Ubos sa Omnibus Election Code, ang mga kandidato tugotan nga maka-file sa ilang SOCE sa dili pa ang 30 ka adlaw human sa election day.
Sa mga South District candidates, ang ilang SOCE adto isumetir sa buhatan ni Sarno ug ang North District candidates adto mo-file sa SOCE sa buhatan ni Atty. Chauncey Boholst, ang election officer.
“Ang atong awhag sa mga nidagan, nakadaug man siya o wala o ni-withdraw, to file a SOCE”, ni Sarno pa.
Sa pagkutlo ning maong balita ang Comelec wala pay nadawat nga SOCE gikan sa mga midagan sa piniliay niadtong Mayo 13 apan aduna nay mga indibidwal nga nangayo og forms. (/DILT)(BANAT NEWS)
- Latest
