Fraternity nisurender sa mga paddle

CEBU, Philippines – Nitahan sa ilang paddle ang Alpha Sigma Omega fraternity ngadto sa kapolisan sa Siyudad sa Talisay sa niaging adlaw.

Kini usa sa mga pagpakita nga nisuporta ang maong fraternity sa Anti-Hazing Law.

Ang national chairman sa ASO nga si Ramir Salonoy kuyog ang upat ka chapter president sa Dakbayan sa Talisay ang nitunol sa ilang tagsa ka paddle ngadto kang Chief Inspector Ardeolito Cabagnot, deputy chief sa Talisay City Police Station.

Giangkon ni Salonoy nga aduna gyud sila’y hazing kaniadto sa dili pa madawat ang usa ka miyembro.

Apan sa dihang napasar ang balaud ilahang nakita nga dili makuha sa pagbunal ang loyalty sa usa ka miyembro.

Imbes nga bunal ang ilang initiation ilaha nang gihimo nga community service.

Samtang dili sila modawat og menor de edad nga miyembro apan usa ka tinun-an sa kolehiyo.

Si Superintendent Marlu Conag, hepe sa kapolisan sa siyudad nipadayag sa iyang kahangop sa gipakitang aksiyon sa maong fraternity.

Si Conag nanghinaot nga unta ang uban pa nga fraternity mohimo og samang lakang.

Matud ni Salonoy nga ang ilang grupo natukod niadto pang 1976 ug niabot na sa kapin 200 ang ilang miyembro diha sa Talisay. Dugang ni Salonoy nga mohatag sila sa ilang suporta ngadto sa kapolisan alang sa kaayohan sa kinabag-an. (/BDB)(BANAT NEWS)