Gitabanga’g dunggab patay

CEBU, Philippines – Nakabsan sa iyahang kinabuhi ang usa ka delivery boy human gitabangan og dunggab sa managsuon pasado alas -12 sa udto kagahapong adlawa sa may White Road, Barangay Inayawan sa Dakbayan sa Sugbo.

Giila ang biktima nga si Landrino Mandaya  Sr., 53, residente ra usab sa maong lugar. Ang biktima nakahiagom og mga samad sa liog, ulo ug sa uban pang bahin sa kalawasan nga miresulta sa iyahang kamatayon.

Gidali pagdala ang biktima sa tambalanan apan nakabsan ra usab kini didto. Giila ang managsuong suspetsado nga sila si Arnel Apostol, 25, ug Danilo Apostol, 29, residente usab sa maong lugar.

Si Vince Labrada Monterde, barangay administrator sa Barangay Inayawan nagkanayon nga nagkinataw-anay ang biktima ug ang kauban niini paglabay nila sa tungod sa managsuong suspetsado.

Nasuko ang mga suspetsado hinungdan sa nahitabong lalis ug nagkasukmagay ug nisangko sa pagpanunggab gamit og kutsilyo ug ice pick. Nakahigayon pa og ilog ang biktima sa icepick  ug nadunggaban si Arnel.

Ang mga suspetsado nangadakpan sa mga tanod nga gipanguluhan  ni Eddie Abapo. Ang mga suspek gibalhog na karon sa Pardo Police Station. (/IBM)(BANAT NEWS)