Devotee City hingpit na nga gibuksan

CEBU, Philippines — Hingpit na nga gibuksan sa kagamhanan sa siyudad ug Probinsiya sa Sugbo ang Devotee City nga maoy temporaryong puy-an sa mga deboto ni Senior Santo Niño nga gikan pa sa nagkalain-laing lugar.

Si Konsehal Eugenio Gabuya, Jr., chairman sa committee on public services nga niabot na ngadto sa 900 ka deboto ang naa karon sa Devotee City diin kasagaran kanila gikan sa Lungsod sa Pinamungajan ug Dakbayan sa Bogo.

Matud ni Gabuya nga gilauman nila nga moabot ngadto sa 3,000 ka deboto ang mopahimulos sa  temporaryo ug libre nga kapuy-an nga giandam sa kagamhanan sa Dakbayan sa Sugbo.

“Based in last year we are expecting mga 3,000 so by tomorrow modaghan na gyud ni”, matud ni Gabuya.

Niining tuiga, niabot sa 60 ka container van ang gimontar alang sa Devotee City ug matag usa niini 50 ka tawo ang capacity. Apan gumikan kay napanglantawan nga daghan pa ang magparehistro adunay giandam nga mga tent aron didto ipahiluna ang uban kon ugaling mapuno na ang mga container van.

Kasagaran usab sa mga niukopar sa container vans ang mga manindahay kinsa nagtinguhang mobaligya sa ilang mga produkto atol sa Sinulog Festival.

Aron masiguro ang kalimpiyo sa Devotee City dunay basurahan nga gibutang ang siyudad ug ang mga Barangay Environmental Officer (BEO) mosuroy usab sa dapit. Walay angay nga kabalak-an sa seguridad sa lugar sanglit gawas sa mga polis nga gi-assign sa Devotee City dunay mga Barangay Intelligence Network(BIN) nga motabang sa pagbantay pagmentenar sa kahusay ug kalinaw sa Devotee City.

Gani ang Cebu City Health Department adunay personnel nga gi-assign sa Devotee City aron maoy mosusi sa mga deboto nga dunay gihambin sa panglawas sama sa hilanat ug kalibanga ug manghatag usab sila og libreng tambal.

“Naa tay doctor, naa tay nurse, naa tay BHW to get the blood pressure then naa sad tay sanitary inspector to make nga ang food nga ihatag sa atong devotees is safe”, matud ni Dr. Alma Corpin, Cebu City Health Officer.(/BDB)(BANATNEWS)