Acting provincial election supervisor nilingkod na
CEBU, Philippines — Nilingkod na kagahapon ang acting provincial election supervisor sa Sugbo nga si Atty. Jerome Brillantes.
Si Brillantes gikan kini sa Probinsiya sa Siquijor ug maoy nihulip kang Atty. Lionel Marco Castillano kinsa toa usab didto sa maong lalawigan.
Ang pagbayloay sa maong mga opisyal subay kini sa gipatuman nga lahugay sa Commission on Elections (Comelec) diin molungtad kini hangtud sa bulan sa Hunyo o sa tibuok election period.
Mao kini ang unang higayon nga si Brillantes na-assign sa Sugbo isip acting election supervisor apan dili na bag-o kaniya ang Sugbo sanglit dinhi siya nag-eskwela kaniadto.
Sa paglingkod ni Brillantes, iyahang ipadayon ang nasugdan na nga preparasyon sa Comelec sa probinsiya alang sa umaabot nga election. Sa Enero 11, gikatakda nga magtigom ang Comelec ug ang Cebu Provincial Police Office alang sa pag-finalize na sa security plan alang sa tibuok election period nga magsugod sa Enero 13 diin ipatuman na usab ang election gun ban.
Lakip nga mahisgutan atol sa maong tigom ang mga areas of concern o ang gitawag nga Election Watchlist Areas (EWAS) kon naapil ang lungsod sa Tuburan, Lapu-Lapu ug Ronda.
“Ato na siya i-evaluate karong 11, kon unsay dagan na... so far Cebu or kaning region-7 nga election dili man gyud kaayo intense ang gubot during election”, matud ni Brillantes.
Sa petsa 12, gikatakda usab nga magtigom ang mga election officer sa Sugbo uban ang acting election supervisor alang sa dugang update sa ilang preparasyon sa umaabot nga May 13, 2019 election. (BANAT NEWS)
- Latest
