300 gipabakwit tungod sa LPA

CEBU, Philippines — Gipahibalo sa Philippine Atmospheric, Geophysical, and Astronomical Services Administration (PAGASA) sa Mactan station nga aduna na say bag-ong Low Pressure Area nga nisulod sa Philippine Area of Responsibility (PAR).

Si PAGASA-Visayas chief Alfredo Quiblat, Jr. mipasidaan nga makasinati ang probinsya sa Sugbo og mga pag-ulan tungod sa bag-ong weather system nga nabantayan. Matud niya nga nahilis na ang LPA niadtong Huwebes sa gabii nga una nang nakasulod sa PAR.

Ang naunang LPA nagdala og kusog nga pagbunok sa uwan maoy rason nga gibaha ang tulo ka barangay sa Lungsod sa Tuburan.

Si Julius Regner, information officer sa Provincial Disaster Risk Reduction and Management Office, nagkanayon sa laing interbyu nga nagpahigayon og preemptive evacuation ang lokal nga opisyal sa maong lugar.

Dugang niya sobra sa 300 ka pamilya ang gipabakwit sa mas luwas nga lugar niadtong Huwebes, ug sa sunod nga adlaw hinay-hinay lang pud sila og uli sa ilang mga panimalay.

Nagpadala ang Kapitolyo og mga relief goods sa Tuburan ug na report usab nila nga adunay mga sundalo ug mga responders gikan sa Asturias nga mitabang sa pag-secure ug pag-assist sa mga pamilya.

Tungod kay aduna pa’y laing LPA nga misulod sa PAR kagahapon sa kaadlawon, ang PDRRMO nagpadayon sa ilang blue alert status.

Si Quiblat, miingon nga ang LPA nabantayan niadtong Biyernes sa buntag nga naglihok ibabaw sa kadagatan sa Pilipinas nga may gilay-on nga 900 kilometers east sa Surigao City, Surigao del Norte.

Matud niya ubos kaayo ang tsansa nga ang bag-ong LPA mokusog ug mapormang bagyo ug layo usab ang posibilidad nga maabot kini sa kayutaan tungod kay mahilis ra kini dayon ugmang adlawa apan makasinati gihapon og mga pag-ulan karong mga panahona hangtud ugma.

Giawhag niya ang publiko, ilabi nga ang mga disaster managers, nga magpadayon sa pag-monitor sa mga weather advisories kon pananglit aduna may mga kausaban sa dagan sa panahon.

Ang sunod-sunod ug walay hunong nga pag-ulan posibleng makadala og landslide sa mga kabukiran ug pagbaha sa mga low-lying areas o sa duol sa kasapaan. Si Quiblat miingon nga sa Lunes ug Martes, posibleng monindot na ang panahon sa probinsya. (/IBM)(BANATNEWS)