Nagdala og shabu sa resort nasakpan

CEBU, Philippines – Nasakpan ang usa ka babaye nga nagdala og shabu sulod sa usa ka resort sa Dakbayan sa Lapu-Lapu.

Ang nasikop mao si Lerea Ladea Banasig, 32, taga Barrio Luz, Dakbayan sa Sugbo.

Siya nadakpan sulod sa Mactan Isla Resort and Casino sa Ibabao, Agus, Dakbayan sa Lapu-Lapu alas 5 pasado sa hapon niadtong Martes.

Ang security guard nga si Ronald Ugdiman kauban ni PO3 Junrey Batubalunos maoy nakasigpat sa gidala nga clutch bag ni Banasig nga adunay sulod nga usa ka gamay nga putos nga shabu hinungdan sa pagkasikop.

Samtang dul-an sa P40 mil nga balor sa shabu ang nasakmit gikan sa pito ka dinakpan sa sunod-sunod nga operasyon sa kapolisan diin usa niini menor de edad sa Sitio Kalubihan, Guadalupe, Siyudad sa Sugbo niadtong Martes sa kaadlawon.

Nakuhaan og tagsa-tagsa ka gagmay nga pakete sa shabu nga mobalor og P5,800 ang matag usa sila si Mary Ann Navarro Torrenueva, 43; Ma. Socorro Cortes Bantigue, 51, ug Guelly Panares Cuevas, 46, pulos molupyo sa maong lugar.

Pipila ka minutos ang nilabay, duha sab ang nasikop sa Sitio Kalubihan, Banawa, sa maong barangay nga giila nga sila si Marjon Navarro Pasatiempo, 23, residente sa maong lugar ug Mark Ehron Dupal-ag Avila, 20, taga Tangil, Dumanjug, kinsa pulos nakuhaan og tagsa-tagsa ka pakete sa shabu nga balor og tag P5,800 ang usa.

Sa alas 2:05 sa kaadlawon nasikop sab ang usa ka 17-anyos nga lalaki ug Erica Mae Navarro Pasatiempo, 21, molupyo sa maong lugar, kinsa nakuhaan sab og tag-usa ka gagmay nga pakete sa shabu nga kantidad og tag 5,800.

Samtang nasakmit sa kapolisan ang armas ug shabu gikan sa pusher nga nadakpan sa Sitio Takan, Ibabao, Cordova niadtong Martes sa hapon.

Si Senior Police Officer 1 Larry Wagwag niila sa nadakpan nga si Jimmy Pinoso, 38, taga Pilipog sa maong lungsod, kinsa napalitan og usa ka medium-size nga shabu gamit ang P2,000 nga marked money.

Dihang girekisa nasakmit ang kalibre .38 nga armas nga may mga bala ug magazine sa kalibre .45 nga puno sa mga bala.

Samtang ang kapolisan sa Lungsod sa Consolacion ang nakasakmit sab og shabu sa duha ka menor de edad nga taga Barangay Pitogo.

Ang duha ka batan-on nasigpatan nga nag-tambay sa maong lugar ug dihang nakakita og mga polis namatikdan nga daw nahadlok hinungdan nga ilang girekisa.

Nakuha ang kalibre .38 nga puno sa mga bala ingon man upat ka putos sa shabu hinungdan nga sila gidakop.

Laing tulo ka tawo nasikop sa managlahing buy-bust operation sa kapolisan sa Dakbayan sa Talisay kagahapon sa buntag.

Sa Sitio Magay, Tangke nasikop si Rodney Marinas alyas Topik, 30, taga Sitio Kamanggahan, San Roque, kinsa nasakmitan og mga pinutos nga drugas nga balor sa dul-an P41 mil.

Ikaduhang nasikop mao si Christian Yares, 27, residente sa maong lugar, kinsa nasakmitan og shabu nga balor og P78 mil.

Ikatulong nasikop sa may Sitio Rattan, Tangke mao si Enegeim Tecson, 18, taga Poblacion Ward 2, Minglanilla, kinsa nasakmitan og usa ka putos sa ginadiling drugas nga balor og P500. (Pegeen Maisie M. Sararaña, Rowena D. Capistrano/GMR)(BANAT NEWS)