Mga mitabang sa nalunod gipasidunggan
CEBU, Philippines — Girepresentar ni Mayor Vicente Loot sa Daanbantayan ang pagpanghatag og certificate of appreciation ngadto sa mga kawani sa Municipal Disaster Risk Reduction Office (MDRRMO), Barangay Peacekeeping Action Team (BPATs) ug pipila ka mga trabahante sa Kandaya Resort alang sa ilang kaisog sa pagluwas sa 14 ka mga pasahero nga nilukso sa kadagatan sa Barangay Agujo, Daanbantayan.
Ang pamilya ni Rosalie Bolonias sa Sitio Cang-oyao, Barangay Bitoon luwas kini nga gidala sa ilang panimalay gamit ang rescue vehicle sa MDRRMO human sa nahitabong aksidente sa ilang pagbiyahe sakay sa pump boat nga naggikan sa Masbate paingon ngadto sa Daanbantayan.
Ang maong insidente nahitabo mga alas 5:30 sa hapon niadtong Biyernes, Abril 20, 2018 diin ang pump boat nga gisakyan sa pamilya ni Bolonias nasangad sa dakong gasang hinungdan nga nabuslot kini ug nalunod.
Ang mga kawani sa Kandaya Resort dali nga mitabang sa pamilya sa biktima ug mipahibawo dayon ngadto sa MDRRMO responders kinsa dali usab nga miresponde.
Atol sa flag raising kagahapon sa munisipyo sa Daanbantayan 15 ka rescuers ang gihatagan og certificate ni Loot.
Ang nahisgutang rescuers sa Kandaya Resort gilangkuban nila ni Aizel Taok, Kheven Mata, Junnie Intrampas ug Junnel Auxterio samtang sa MDRRMO gilangkuban nila ni Lani Dublin, Gleeter Bumaat, Ronwaldo Batad, Daciano Aaron Julius Tancawan, Mariano Compuesto Jr., Rodelio Rosell, Carl Archie J. Rosario ug Paul Tuling. Sa BPAT mao si Jose Briones ug ang mibulontaryo nga si Pedro Illustrisimo ug Antolin Villegas. - Mary Mel V. Coma, PIT Intern (BANAT NEWS)
- Latest