Barug nitunol na sa P300 mil reward

CEBU, Philippines — Gitunol na ngadto sa Police Regional Office-7 ang P300 mil nga reward money gikan sa Barug Partido Demokratikong Pilipino-Lakas ng Bayan (Barug PDP-Laban) alang sa mga informants nga nakatabang pagsulbad sa pagpusil kang Ermita barangay kapitan Felicisimo Rupinta.

Ang nitunol sa kwarta mao sila si Cebu City Vice Mayor Edgardo Labella ug Konsehal Joel Garganera.

Matud ni Garganera nga dili dali ang ilang pagtigum sa kwarta human niabot og upat ka buwan sukad gipatay si Rupinta ang pagtigum sa mga amot nga kwarta.

Nagdumili si Labella pagkomentaryo kung kinsa ang utok sa krimen sanglit anaa na ang kaso sa piskaliya ug sa korte.

Matud ni Police Senior Supt. Franklyn Mabanag nga ang reward money nakapadani sa pagpatim-aw sa informants aron mailhan ang suspek.

Si Police Supt. Reyman Tolentin, tigpamaba sa PRO-7, nitataw nga maisip nga sulbad na ang kaso sanglit may nadakpan na ug napasakaan og kaso.

"Finally," maoy tubag ni Mayor Tomas Osmeña kabahin sa P300 mil nga reward money nga gihatag sa partido nga iyang kaatbang sa politika.

Si Rupinta kinsa kaalyado sa Barug PDP-Laban ang gibanhigan patay niadtong Nobiyembre 23 sa Sitio Simborio, Tayud, Lungsod sa Liloan.

Matud ni Osmeña nga gusto sa iyang kaatbang nga siya ang matumbok nga mastermind hinungdan sa pagtanyag og P300 mil ni bisan kinsa nga andam motestigo.

Alang kang Osmeña, ang mastermind mao ang kapuyo ni Rupinta nga si Jocelyn Mendoza kinsa luwan sa sakyanan atol sa hitabo apan kini nihimakak na sa maong pasangil. - Kathleen Kaye G. Gonzaga, Jomelyn B. Largado, ug Erly Ann Alcontin, CNU Interns  (BANAT NEWS)